42

159 Madde: Ayn, muayyen ve müşahhas olan şeydir.
Meselâ bir hâne ve bir at ve bir sandalye ve meydanda mevcûd bir yığın buğday ve bu mikdar akçe hep a'yândandır.

160 Madde: Bâi', mal satan.

161 Madde: Müşterî, satın alan.

162 Madde: Mütebâyiân, bâi' ile müşteridir ki (âkıdîn) dahi denir.

163 Madde: İkâle, akdi ref' ve izâle etmekdir.

164 Madde: Tağrîr, aldatmak.

165 Madde: Gabn-i fâhiş, urûzda nısf-ı uşr ve hayvanatda uşr ve akarda hums mikdarı ve yâhud ziyâde aldanmakdır.

166 Madde: Kadîm odur ki evvelini bilir kimse olmaya.

( Bâb-ı Evvel )

( Akd-i bey'e müteallik mesâil beyânında olub beş faslı hâvîdir )

( Fasl-ı Evvel )

( Rükn-i bey' hakkındadır )

167 Madde: Îcâb ve kabûl ile bey' mün'akid olur.

168 Madde: Bey'de îcâb ve kabûl, örf ve âdet-i beldede inşâ-i bey' içün müsta'mel olan lafızlardır ki bunlarla pazarlık kesilüb lisanımızda hayırlaşmak ta'bîr olunur.

169 Madde: Îcâb ve kabûl içün ekseriyâ mâzî sîgası isti'mâl olunur.
Meselâ bâi' şu metâı sana yüz guruşa satdum ve müşterî dahi aldum ve yâhud müşterî aldum ve ba'dehû bâi' satdum dese bey' mün'akid olub evvelki sûretde ( satdum ) lafzı îcâb ve ( aldum ) lafzı kabûl ve ikinci sûretde aldum lafzı îcâb ve satdum lafzı kabûldur.
Ve kezâ bâi' satdum yerine virdüm ve yâhud temlîk etdüm deyüb müşterî dahi aldum yerine râzî oldum ve yâhud kabûl eyledim dese bey' mün'akid olur.

170 Madde: Alurum ve satarım gibi muzâri' sîgasıyla hâl murâd olunursa bey' mün'akid olur ve eğer istikbâl murâd olunursa mün'akid olmaz.

171