429

İkiyüz elli ikinci madde: Her ne kadar konkordato akd ve tanzim olunmuş ise de yine alacaklının müflisin kefil ve müteahhidlerinden alacaklarının tamamını iddiaya salahiyetleri derkardır.

(Nev-i sani rehin ile temin olunmuş ve gerek menkulatdan olan eşya üzerine)
(imtiyazlı bulunmuş olan alacaklılar hakkındadır)

İkiyüz elli üçüncü madde: Müflisin usul-i mer’iyeye tatbikan rehin ile temin olunmuş olan alacaklılarının esamisi yalnız ihtar içün masa defterine kayd ettirilir.

İkiyüz elli dördüncü madde: Vekiller diledikleri vakit ticarethaneden tayin kılınmış olan memurun ruhsatiyle masanın faidesi zımnında deynin te’diyesiyle mukabilinde terhin olunmuş olan eşyayı istirdad etmeğe me’zundurlar.

İkiyüz elli beşinci madde: Bir rehin vekiller tarafından istirdad olunmayıp da alacaklı canibinden alacağından ziyade baha ile füruht olunur ise fazlası vekillerden ahz olunur. Kaldı ki rehnin bahası alacaklının alacağından dûn ise kusur içün adi alacaklılar misillü müflisin masasına dahil olurlar.

İkiyüz elli altıncı madde: İflasın ilanını takaddüm eden otuz bir gün zarfında müflisin bizzat istihdam etmiş olduğu amelenin ücreti ve kezalik iflasın ilanından mukaddem olan altı mah zarfında istihdam olunmuş olan yazıcıların ücret ve mahiyeleri imtiyazlı düyun adadındadır.

İkiyüz elli yedinci madde: Müflisin menkulatdan olan eşyasına imtiyaz hakkının iddasında olan alacaklıların defteri vekiller tarafından ticarethane canibinden tayin kılınan memura teslim olunup işbu alacaklıların matlubatı evvel be-evvel tahsil olunacak mebaliğden ita olunmak hususu tensib olunur ise memur-ı mumaileyh tarafından ol-babda ruhsat verilir. Kaldı ki imtiyaz hakkına muarıza vukuunda ticarethaneye havalesiyle hükm olunur.

(Nev-i salis eşya-yı gayr-i menkule üzerinde istiğlal ve imtiyazı olan)
(alacaklıların istihkakatı beyanındadır)

İkiyüz elli sekizinci madde: Eşya-yı gayr-i menkule esman-ı hasılasının tevzi’i