441

İki yüz doksan ikinci maddede muharrer töhmetler ile müttehem olan eşhas hilekâr müflis hakkında terettüb eden te'dibata müstehak olurlar.

İki yüz doksan beşinci madde
Müflise aid olan eşyayı ihrac ve tefrik ve kitm ve ihfa etmiş olan müflisin zevcesi ve âbâ ve evlad ve sair akrabası her ne kadar müflis ile müttefikan amel ve hareket etmişler ise de ber-vech-i muharrer eşyayı kitm ve ihfa eyledikleri sabit ve mütehakkık olduğu halde sâriklere mahsus te'dibata müstehak olurlar.

İki yüz doksan altıncı madde
Sâlifü’z-zikr maddelerde muharrer hâlâtın zuhurunda her ne kadar müflisin beraet-i zimmeti tebeyyün eder ise de ol hile ile ihrac ve kitm ve ihfa olunan bi’l-cümle emval ve hukuk ve sairenin alacaklıların masasına irca ve iadesi ve saniyen ba-ilam mikdarı tahsis kılınacak güzeşte ve ziyanın tazmin ve te’diyesi hususları ticarethane tarafından tahsis ve hükm olunur.

İki yüz doksan yedinci madde
İflas muamelatının idaresinde zulm ve taaddi ile müttehem olacak her bir vekilin te’dibi iki aydan ekall ve iki seneden ziyade olmamak üzere habsden ibaret olup zarardîde olan kimselere iade olunacak emval ve tazminatın rub’unu tecavüz etmemek ve nihayet yüz kuruşdan ekall olmamak üzere cerime itasından ibarettir.

İki yüz doksan sekizinci madde
İflas musalahatının müzakeratında re’yini söylemeye salahiyeti olan alacaklı müflisin lehisinde vaki olacak re’yine mükafat olmak üzere kendi menfaat-i mahsusasıyçün gerek müflis ve gerek sair kimseler ile ahd ve şart etmiş veyahud müflisin nukud-ı mevcudesinden ahz olunmak üzere kendisine bir faide terettübünü mucib mukavele-i mahsusanın akd ve rabtına mübaderet eylemiş olduğu takdirde müddeti bir seneden ziyade olmamak üzere habs olunur eğerçi zikr olunan alacaklı iflasın vekilleri zümresinden ise habs müddetinin iki seneye kadar imtidadı icabındandır.

İki yüz doksan dokuzuncu madde
Sâlifü’z-zikr madde mantukunca bu vechle akd olunan hileli mukavelat gerek müflis ve gerek sairleri hakkında fesh