445

İade-i itibarı hususunu tahsile salahiyetleri yoktur. Maamafih taksiratlı müflis hakkında hükm olunmuş olan te’dib ve terbiye icra olunduktan sonra iade-i itibara mazhar olabilir.

Üç yüz on dördüncü madde: İade-i itibara nail ve dest-res olamayan her bir müflisin kambiyo ahz ve itasına mahsus olan Borsa tabir olunur mahalle duhulü ve kambiyo ahz ve itasına mübaşereti caiz değildir.

Üç yüz on beşinci madde: Müflis olduğu halde vefat etmiş olan kimsenin vefatından sonra veresesi tarafından tekmil-i arz ve iade-i itibarı caizdir.

(Fi 18 Ramazan sene 1286)

(Ticaret Kanunname-i Hümayununa Zeyl)
(Birinci Fasıl)
(Mukaddime)

Birinci madde: Kâffe-i deavi-i ticaret zâten ashabı her ne sınıf ve sıfatda bulunur ise bulunsun bilhassa ticaret mahkemeleri tarafından rüyet ve hükm olunacak ve fakat mahkeme-i ticareti olmayan kazalarda mezkûr ticaret davalarının usul ve kanun-ı ticarete tevfikan fasl ve rüyeti hususu hukuk-ı âdiyeye müteallik deaviyi rüyet etmekde olan umur-ı mülkiye meclislerine havale kılınacaktır.

İkinci madde: Kâffe-i deavi-i ticaret derece-i ulâda Dersaadet veyahut taşralar ticaret mahkemelerinde rüyet olunur fakat yalnız işbu derece-i ulâ mehakiminde kat’iyen fasl ve hükm olunması kanunen muayyen olan davalardan maada deavi-i ticaretin derece-i saniyede Divan-ı İstinafa nakli caiz olur.

Üçüncü madde: Zirde muharrer usul ve nizama tatbikan Dersaadet’de bir istinaf deavi-i ticaret divanı tesis ve teşkil olunacaktır.

Dördüncü madde: Ticaret mahkemelerinin adedi ve tayin olunacak merkezi ve bunların başka başka hükm ve idaresine tabi olacak memalik ve mevakiin...