447

Vüs'atli ve cesametli bulunduğundan işbu mahkemenin bir reis ile iki reis-i sanisi ve her bir meclisin dörder azay-ı daime ve sekizer azay-ı muvakkatesi olacaktır. İşbu iki meclisin her biri masalih-i vakıanın sürat-i tesviyesi için icabı takdirinde ayrı ayrı iki odaya taksim olunabilecektir.

Onuncu Madde: Reis-i evvel ve sani ve azay-ı daime Ticaret Nezareti'nin takririle müteallik buyurulacak irade-i seniye mucibince nasb ve tayin olunacaktır. Bu misillü memuriyetler taşralar mahkemeleriçün icra olunmak icab ettiği takdirde mahallinde bulunan en büyük memur ile Nezaret-i müşarünileyhanın evvelce muhabere etmesi lazım gelecektir. Her halde zikrolunan memuriyetlere ehl-i ırz ve müstakimü'l-atvar ve ehl ü erbab ve dirayetkâr ve usul ve kavanin-i ticarete vakıf bulunanlar memur olacağından bunların bu sıfatlar ile mevsuf oldukları Ticaret Nazırı tarafından ba'de't-tasdik memuriyetleri arz ve istizan olunacaktır.

On Birinci Madde: Memurin-i mumaileyhim münasip miktar maaş ile muvazzaf olup istifaları vuku bulduğu halde kabul olunmadıkça veya üzerlerine bir gûne cinayet ve cünha için bir hüküm terettüb etmedikçe veyahut ahar bir memuriyete tayin kılınmadıkça memuriyetlerinden infisal etmeyeceklerdir.

On İkinci Madde: Reis-i evvel ve sani bir gün mecliste hazır bulunamadığı halde mecliste mevcut olan azanın memuriyetçe en kıdemlisi o gün riyaset memuriyetini ifa edecektir.

On Üçüncü Madde: Mahakim-i ticaret azay-ı muvakkatesinin intihabı keyfiyeti mahallinde istikamet ve hüsn-i hal ile maruf ve hüsn-i idare ve tasarruf erbabından olan en kadim ve muteberan tüccardan mürekkep bir meclis akdiyle icra kılınacaktır.

On Dördüncü Madde: Her bir mahkeme-i ticaretin dahil-i daire-i hükmü olan mahallerde mevcut bilcümle tüccardan müntehab olmak üzere tefriki lazım gelen muteberan tüccarın defteri mahkeme-i ticaretin kâin olduğu mahalde bulunan Ticaret Kançılaryası müdürleri marifetiyle behersene ibtidasında tanzim olunacaktır.