449

Diğer aza-yı muvakkate beher altı ayda bir kere icra olunacak intihabat-ı mütaakibede alel-umum bir sene için intihab ve nasb kılınacaklardır.

On dokuzuncu madde — Bir sene memuriyetleri hitamında infisalleri lazım gelen aza-yı muvakkate muvafakatleriyle tekrar ikinci sene için intihab olunabileceklerdir. Ancak işbu ikinci sene memuriyetleri dahi münkazıye oldukda üçüncü sene için arası bir sene mürur etmedikçe yeniden intihab olunamayacaklardır.

Yirminci madde — Aza-yı muvakkateden biri ilan-ı iflas ettiği ve cinayet ve cünha ile mahkum olduğu veyahud bir memuriyet-i mülkiyeyi kabul eylediği takdirde azalık memuriyetinden munfasıl olacakdır. Bu misillü memurin-i munfasılanın yerine on üçüncü ve on beşinci ve on altıncı maddelerde münderic olan ahkam ve usul mucibince diğer aza-yı muvakkate serian tayin olunacakdır.

Yirmi birinci madde — Aza-yı muvakkateden birinin vuku-ı vefatına veyahud kabul olunan istifasına veyahud madde-i sabıkada muharrer esbabdan dolayı vukua gelen infisaline mebni yerine intihab ve tayin olunacak olan zat selefinin müddet-i memuriyeti ne kadar kalmış ise o kadar vakit azalık memuriyetini icra edecektir.

Yirmi ikinci madde — Ber-vech-i muharrer tayin olunacak aza-yı muvakkateden başka hiç bir kimse azalık sıfatıyla mahkeme-i ticarette bulunamayacakdır. Şayet bulunur ise verilen karar muteber olamayarak ke-en-lem-yekün hükmünde kalacakdır.

Yirmi üçüncü madde — Her bir mahkeme-i ticarette bir baş katib ile bir veyahud icabına göre daha ziyade katib ve kezalik bir veyahud ziyade tercüman ve lüzumu miktar müstakimü'l-atvar kefilli mübaşirler bulunacakdır.

Yirmi dördüncü madde — Mahkeme-i ticaret baş ve sair katibleri ve tercümanları Dersaadet'de ise doğrudan doğruya ve taşralarda ise mahalli ticaret mahkemesi reisi ve hükümetin en büyük memuru ittifakıyla taraflarından ba'de'l-inha

57
L