470

Bâyiinin alacaklıları tarafından bir gûne mütalebe ve iddia vuku bulmayarak altmış
günden mütecaviz seferde bulunmuş olduğu takdirde ol sefine bahre sefer
etmiş addolunacaktır.
Dokuzuncu madde: Bir sefinenin esnâ-yı seyr ü seferinde rızâ-yı vâki olan
füruhtundan dolayı bayiin alacaklılarının hak ve imtiyazlarına halel gelmez.
Binâenaleyh her ne kadar satılmış ise de sefine veyahut semeni mârüzzikr alacaklılara
rehin olmaktan halâs olmayacaktır. Bundan başka mârüzzikr ashâb-ı matlûb
istedikleri halde işbu füruht keyfiyeti kendi hak ve imtiyazlarını ibtâl
etmek için yapılmış hile ve desisedir diyerek bu füruhtun fesih ve ilgâsını
dava edebileceklerdir.

( İkinci Fasıl )
( Sefâinin zabt ve füruhtuna dâirdir )

Onuncu madde: Her türlü sefâin ve merâkib-i bahriye mahâkim-i ticaretin hüküm
ve ilâmı ile zabt ve füruht olunabilir. Alacaklıların imtiyazları dahi
âtîde zikr olunan usul ve kaidelerin icrasıyla mülga olur.
On birinci madde: Bir sefinenin zabtını murad eden alacaklının istidası
üzere mahkeme-i ticaretin sâlifüzzikr hüküm ve ilâmından sonra ol emirde
medyuna ifâ-yı deyn hususu resmen emir ve teklif olunup arası yirmi
dört saat geçmedikçe ol sefinenin zabtı hususuna teşebbüs olunamaz.

On ikinci madde: Ânifüzzikr emir ve teklif hususu mahallî hükümeti
marifetiyle bil-icra ifâsı taleb olunan akçe sefine üzerine imtiyazlı
düyundan değil ise sefinenin sahibine veyahut ikametgâhına tebliğ
olunacaktır. Fakat bâlâda mestur beşinci maddenin hükmünce sefine üzerine
imtiyazlı düyundan ma’dûd ise emir ve teklif keyfiyeti ister gemi sahibine
ister kapudanına tebliğ olunabilir.
On üçüncü madde: Mârülbeyan emir ve teklif hususundan yirmi dört
saat mürurunda sahib-i matlub alacağının tahsiline dest-res olamadığı
halde âtîde beyan olunacak usul ve kaideye tevfikan hükümet tarafından
sefinenin zabtına teşebbüs olunacaktır şöyle ki bir nefer mühendise terfikan
mahsûsan