473

Müzayedeye teşebbüs ve kezalik her bir nidadan sonra emr-i füruhta memur olan zat tarafından beher sekiz günde bir kere olarak tayin olunacak günde müzayedeye devam ile zamlar icra olunacaktır.

Yirminci Madde: Üçüncü nidadan sonra olunacak müzayedede en sonra ve en ziyade zam eden her kim ise müzayedenin hin-i bed'inde âdet üzere yakılacak mumların hitam ve intifasında sefinenin ol kimesne üzerine takarrür etmesi lazım gelir. Fakat keyfiyete binaen ol gün karar verilmeyip de ziyade zam me'muliyle bir veya iki defa sekizer gün sonraya tevkif ve te'hiri memur-u mahsusun yed-i iktidarında olup işbu tevkif ve te'hir maddesi gazeteler ve yaftalar marifetiyle ilan birle bu vechle te'ahhur eden günlerde olunacak müzayedede bir gûna zam ve ilave vuku bulmaz ise artık sefinenin tevkif-i mezkûrdan mukaddem üzerine takarrür eden kimesnede kat'iyyen kalması lazım gelir.

Yirmi Birinci Madde: Zabt ve füruht hususu on tonilatoluk yani dört yüz kilelik sefine ve daha aşağı küçük olan kayık ve mavuna ve sair liman tekneleri hakkında icra olunacak olur ise balada beyan olunan tekellüfata hacet kalmaksızın yalnız üç gün mütevaliyen liman kenarında dellal marifetiyle nida ve teknenin sereni var ise serene ve yoğise bir mahall-i zahirine ve Mahkeme-i Ticaret kapusuna ilanname yapıştırılarak ilan-ı keyfiyet olunduktan sonra bil-müzayede füruht kılınacaktır. Fakat teknenin zabtı hususunun tebliğinden füruhta değin tam sekiz gün mürur etmek lazımdır.

Yirmi İkinci Madde: Sefinenin bil-müzayede füruhtu ile kapudanın memuriyeti hitam bulur. Fakat icab ettiği takdirde zarar ve ziyan tazminatının istihsaliçün sefine sahibi ile kefillerinden ve kendisine taht-ı teahhüdde bulunanlardan kapudan-ı merkumun dava etmeğe salahiyeti olacaktır.

Yirmi Üçüncü Madde: Sefinenin mikdar-ı tahammülü ne olur ise olsun bil-müzayede üzerinde takarrür eden kimesneler müzayede-i kat'iyyesinden itibaren yirmi dört...