477

Olan sahib-i sefineden tazmin olunarak nesne talebine dahi hak olmayıp fakat kapudan tayin olunduğu mahalden başka bir mahalde kendisine ruhsat verilmiş ise yalnız ol mahalle avdetiçün masarif-i lâzimenin istihsaline hak olacakdır.

Otuz üçüncü madde: Ruhsat verilen kapudanın gide bir hissesi olduğu halde işbu hissesini terk ve istifa ederek bedelinin istirdad ve istihsaline hakkı olacakdır bedel-i mezkûrun mikdar ve kemiyeti ehl-i hibre marifetiyle takdir olunur ehl-i hibre dahi tarafeynin ittifakıyla ve olamadığı halde mahkeme-i ticaretin inzimam-ı re’yi ile nasb ve tayin kılınır.

Otuz dördüncü madde: Sefine hissedarlarının menafi-i umûmiyesiçün tedabir-i lâzimenin ittihazına dâir olan müzakerelerinde ittifak hasıl olamadığı halde ekseriyet-i ârâ ile karar verilecek ise de işbu ekseriyet-i ârâ keyfiyeti re’y veren eşhasın adedine nisbet olmayıp geminin kıymetine göre nısfından ziyade hissesi olanların re’yi ile hasıl olacakdır sefine müştereken çend nefer kesanın malı olubda beynlerinde veyâ resmen bil-müzayede fürûht ve esmânı taksim olunmak murad olunduğu halde bunun icrasını âhar gûne bir mukavele-i muharrere olmadıkça kıymet-i nısfiyesi kadar hisseleri olan hissedaranın istidaları üzere hükm olunur.

( Dördüncü Fasıl )
( Kapudanlar hakkındadır )

Otuz beşinci madde: Bir sefine veyâ sâir her nevi teknenin süvarisi olub kumandası uhdesine havale olunan her bir kapudan veyâ reis esnâ-yı memuriyetinde eylediği hataların hafifelerinden dolayı dahi mes’ul ve zarar ve ziyanın tazminine mecbur olacakdır.

Otuz altıncı madde: Kapudan naklini deruhde eylediği eşya ve emtianın zayi ve telef ve harab olmasından dolayı mes’ul ve eşya ve emtia-i mezkûrenin ahz ve kabzını müş’ir sened itasına mecbur olub işbu sened poliçe dikariko veyâ konişmento yani tahmiliye senedi tesmiye olunur.

Otuz yedinci madde: Gemi tayfasının tedariki ve sâir bi’l-cümle mellâhanın intihab