482

Ve sair mühimmatı ve yatakları üzerine akçe almış veyahud emval ve emtiadan veyahud zahireden terhin veyahud füruht etmiş veyahud aslı olmayan ba’zı avariye ve masarıf hesaba geçirmiş olur ise bundan dolayı lazım gelenler tarafından mes’ul ve aldığı akçenin redd ve iadesine ve rehin ve füruht eylediği eşyanın tazminine bizzat mecbur olup icabı takdirinde ceza kanunnamesi mucibince dahi mahkum olmak üzere aleyhine dava olunabilecektir.

Elli ikinci madde: Geminin sefere nizamen müsbet olan adem-i kabiliyetinden maada hiç bir halde kapudan sahiblerinden ruhsat-ı mahsusa istihsal etmedikçe füruhtunu icra edemiyecektir ve ettiği halde füruhtu ke’en lem yekün hükmünde tutulacağından başka icab eden zarar ve ziyanın tazminine dahi kendisi bizzat mecbur olacağı kadar geminin sefere adem-i kabiliyeti keyfiyeti bahusus ta’yin ve tahlif olunan ehl-i hibre marifetiyle bittasdik taraflarından tanzim ve imza kılınacak bir kıt’a mazbata ile isbat olunur. Mersumların ta’yini Memalik-i Mahrusa’da mahkeme-i ticaret ve olmadığı halde ticaret kançılaryası ve bu dahi bulunmadığı takdirde meclis-i memleket tarafından ve diyar-ı ecnebiyede devlet-i aliyenin şehbenderi ve bulunmadığı surette icab eden hükümet-i mahalliye canibinden icra olunacaktır. Geminin sefere bir veçhe muharrer isbat olunmuş olan adem-i kabiliyeti cihetiyle füruhtu icab edip de sahiblerinin ruhsatı ve talimatı istihsal olunmadığı halde suk-ı sultanide bil-müzayede icra olunacaktır.

Elli üçüncü madde: Bir seferi müteahhid olan kapudan ol seferin itmamına mecbur olup etmediği halde gerek gemi sahiblerinin ve gerek müste’cirleriyle masarıf-ı vakıasının i’tasına ve zarar ve ziyanlarının tazminine mahkum olacaktır.

Elli dördüncü madde: Hamuleden hasıl olacak kâra ortak olmak üzere sefer eden kapudan ahar gûne bir mukavele-i mahsusası olmadıkça kendi hesabı için hiç bir ahz ve i’ta ve ticaret edemiyecektir.

Elli beşinci madde: Madde-i anifede muharrer olan ahkama mugayir olarak sefine...