484

tarafından kapudan oraya azimetinin ve oradan dahi kalkmasının tarihini ve hamulesinin hal ve cinsini mübeyyin bir kıt'a ilmühaber istihsal edecektir.

Altmışıncı Madde
Kapudan esnâ-yı seyr ü seferinde Osmanlı veya ecnebi limanına tarîk-i mahsusundan ayrılub bizzarure yanaşması iktiza eylediği suretde mahalline göre bâlâda elli sekizinci ve elli dokuzuncu maddelerde gösterilen memurlara yanaşmasının sebeblerini beyan edecektir.

Altmış Birinci Madde
Gemisi gark olub yalnız kendisi veyahut taifeden bazılarıyle beraber halas olan kapudan der-akab mahalline göre bâlâda gösterilen memurlara gidib takririni vermeğe ve garkdan kurtulub kendisiyle beraber olan taifenin ifadeleriyle ol takririni tasdik etdirmeye mecbur ve bir kıt'a musaddak suretini istihsale haklı olacakdır.

Altmış İkinci Madde
Takrir-i mezkûrun tasdiki içün irad olunabilecek sair delillere halel getirmeyerek mârü'z-zikr memurlar tarafından taifelerin mümkün olduğu suretde yolcuların dahi istintaklarıyle ifadeleri istima' ve zabt olunacakdır. Tasdik olunmayan takarir kapudanın mes'uliyetden tahlisi ve hîn-i muhakemede kendü iddasının ispatı zımnında kabule şayan olmayacakdır. Meğer takririni verdiği yerde kapudan yalnız olarak garkdan kurtulub halas bulmuş ola her halde kapudanın aleyhinde bulunan müddeiler anın beyan eylediği mevadın aksini isbata salahiyetleri vardır.

Altmış Üçüncü Madde
Kapudan takririni vermedikçe gemiden hiç bir vakit emval ve emtia ihraç edemez ve etdiği takdirde aleyhinde fevkalade davalar olunabilir. Meğer ki kuvve-i karîbeye gelmiş bir tehlikeden dolayı emval ve emtia heman zayi ve telef olmak üzere buluna.

Altmış Dördüncü Madde
Esnâ-yı seyr ü seferde geminin kumanyası tükenüb de derununda bulunanlardan bazılarının ayrıca me'kûlatları olduğu takdirde kapudan muteberan-ı taifenin re'yini istihsal ederek kıymetlerini vermek şartiyle me'kûlat-ı mezkûreyi ortaya kodurtmağa me'zun olacakdır.

Beşinci