503

Umûr-ı zâbıtasına dâir kapudanı cânibinden vâki‘ olan emir ve tenbîhlere tâbi‘ olmak lâzımedendir.

Yüz otuz yedinci madde
Navlun mikdarı yolcunun kendi nâmına veyâ açık olarak hâmiline verilmek üzere tanzîm olunmuş olan bir konturato veyâ bilet ile ta‘yîn eder. Eğer yolcu bedel-i navlunu mukâveleye rabt olunmaksızın sefîneye binip gitmiş ise navlun-ı misil i‘tâsı lâzım gelip bu dahi tarafeyn uyuşamadıkları hâlde mahkeme tarafından ehl-i hibre ma‘rifetiyle ta‘yîn kılınır.

Yüz otuz sekizinci madde
Konturato veyâ bilet yolcunun nâmına tanzîm ve i‘tâ olunduğu hâlde kapudanın rızâ ve muvâfakati olmadıkça yolcu hakkı şahs-ı dîğere devr edemez.

Yüz otuz dokuzuncu madde
Sefînenin kıyâm ve hareketi için ta‘yîn olunan vakit ve sâatde yolcu seferin bed’inden evvel sefîneye gelmez ve esnâ-yı râhda dahi taşraya çıkıp avdet etmez ise kapudan beklemeye mecbûr olmayarak hareket edebilir ve yolcu dahi navlun bedelini tamâmıyla te’diyeye mecbûrdur.

Yüz kırkıncı madde
Yolcu seferin bed’inden evvel konturatosunun feshini murâdında bulunduğunu beyân ettiği yâhud bunu beyân etmeyip de vefâtı veyâ hastalığı cihetle yâhud şahsına âid dîğer bir özr-i meşrû‘ zuhûruyla sefîneye gelemediği tebeyyün eylediği hâlde bedel-i navlun yalnız nısfını te’diyeye mecbûr olur ve eğer bu hususlar esnâ-yı râhda vâki‘ olur ise navlun bedelini tamâmıyla îfâya borçludur.

Yüz kırk birinci madde
Sefîne bir kazâ-yı bahrîden dolayı zâyi‘ ve telef olduğu hâlde yolcu konturatosu tamâmıyla fesholunur.

Yüz kırk ikinci madde
Bir muhârebe vukû‘uyla sefîne zabt olunmak tehlikesine dûçâr olarak serbest nazarıyla bakılamaz olduğu veyâhud kapudanın yâ tâbi‘ olduğu kumpanyanın uhde-i iktidârından hâriç olan esbâb-ı mücbireden nâşî seferin bed’inden evvel veyâ sonra seyr ü hareketi bütün bütün muattal kalmış veyâ te’hîr olunmuş olduğu hâlde yolcu konturatosunu fesh etmeye