511

( On birinci fasıl )
( Sigorta yani te’min keyfiyeti hakkındadır )
( Kısım-ı evvel )
( Sigorta kontratosunun suret-i tanzimine )
( ve mebni aleyhine dairdir )

Yüz yetmiş beşinci madde Sigorta kontratosı sefer-i bahri tehlikesine uğramalarından ihtiraz olunan şeylere kaza-i bahriden dolayı vukua gelebilecek zayiât ve mazarratın bir miktar-ı muayyene kadar sigorta eden tarafından alınan bedel-i sigortaya mukabil sigorta ettiren tarafa tamamen te’diye-i tazminin taahhüdünü mutazammın bir mukavele-i bahriyeden ibarettir.

Yüz yetmiş altıncı madde Sigorta kontratosı yani mukavele senedi suret-i resmiyede veyahud yalnızaca tarafeyn beyninde açık mahal bırakılarak tanzim olunub derununda evvelâ imza ve temhir olunduğunun sene ve ay ve gün ve saati saniyen sigorta ettiren kimsenin sahib-i mal veyahud komisyoncu olduğunun beyaniyle beraber isim ve şöhret ve mahal-i ikameti salisen sigorta olunan emval ve eşyanın cins ve bahası veyahud takdir olunmuş olan kıymeti ile ne miktar akçe içün sigorta olunduğu rabian sigortacının deruhde ettiği tehlikeler hamisen işbu tehlikelerin sigortacı içün bed’ ve intihası vakit ve tarihleri sadisen sigorta bedeli sabian kapudanın ismiyle geminin nam ve nevi saminen emtianın tahmil olunduğu veyahud olunacağı mahal tasian sefinenin hareket ettiği veyahud edeceği liman aşiren geminin mal alub çıkaracağı veyahud girub veyahud yanaşacağı liman ve iskeleler hadi aşer niza vukuunda işbu nizaın mümeyyizler marifetiyle hükm ve tesviyesi tarafeyn beyninde mukavele olunmuş ise işbu mukavele sani aşer alel-umum tarafeynin mukaveleye rabt ettikleri bilcümle şerait zikr ve beyan olunur.

Yüz yetmiş yedinci madde Bir sigorta senedi emtianın tenevvüüne ve sigorta bedelinin tefavüt-i miktarına ve sigortacıların taaddüdüne göre birkaç sigortayı havi olabilir.

Yüz yetmiş sekizinci madde Sigortanın mebni aleyhi yani kabil-i sigorta