515

Yüz doksan üçüncü madde: Sigorta kontratosunda sigorta ettiren şahıs tarafından beyan olunması lâzım gelen şeyler meskûtünanh kalmış yâhud hilâf veyâ tahmîliye senedinde gösterildiğinden farklı olarak ifâde kılınmış olub da işbu sükût yâ ifâdeden vukû‘u maznûn olan dereceye kadar tehlike olmamak veyâhud ol tehlike-i maznûneden başka bir tehlike olmak lâzım gelerek vukû‘-ı hâl-i sahîhi sigortacı tarafından bilinmiş olsa olunan kontratonun hîç olunmaması veyâhud şerâit-i uhrâ ile akd olunması melhûz bulunduğu takdîrde olunan kontrato sigortacı hakkında keenlemyekün hükmünde tutulur vâki‘ olan işbu sükût yâhud hilâf yâ farklı ifâde sigorta olunan şeyin hasârına ve zâyi‘ ve telef olmasına sebeb olmamış olsa dahi yine sigortanın hükmü sâkıt olur.

( Kısım-ı Sâni )

( Sigorta eden ve ettiren kimesnelerin vâcibe-i zimmetleri beyanındadır )

Yüz doksan dördüncü madde: Bâlâda muharrer yüz yetmişinci madde mûcibince tehlike-i bahriyenin cereyânına bed’inden evvel sigorta ettiren kimesnenin sebebiyle olsa bile seferden ferâgat olunduğu hâlde sigorta kontratosunu fesih ve bedel-i sigorta te’diye olunmuş ise istirdâd olunur şu kadar ki sigortacının tazmîn-i zarar makâmında sigorta olunan eşyânın kıymetinden yüzde yarım almağa ve eğer yüzde birden aşağı sigorta olunmuş ise sigorta bedelinin nısfını istihsâle hakkı vardır.

Yüz doksan beşinci madde: Fırtına ve gark ve şikest maddelerinden ve kazâ karaya uğramak ve çatmak ve bi’z-zarûre tarîk veyâ sefer veyâ gemi tebdîl ve tahvîl edilmek ve denize eşyâ atılmak ve yangın olmak ve zabt ve gasb olunmak ve devlet emriyle tevkîf ve i‘lân-ı harb ve hasmın ettiği husûmete mukâbele edilmek husûslarından ve sâir mehâlik ve muhâtarât-ı bahriyeden dolayı sigorta olunan şeylere vâki‘ olan kâffe-i zâyi‘ât ve hasârât sigorta edenlere âid ve râci‘ olur.

Yüz doksan altıncı madde: Bilâ-zarûret tarîk veyâ seferin veyâ geminin...