519

Vusulünden sigortacının haberi olmadığı halde veyahut olunan kontratoya vaz'-ı imza etmezden evvel zayi ve telef olduğundan sigorta ettirenin ve mahalline vusulünden sigortacının malumatı olabileceği idüğüne dair bir zann-ı galib bulunduğu takdirde vaki olan marüzzikr sigorta ke-en-lem-yekün hükmünde olur.

İki yüz on birinci madde: Bu'd-ı mesafeye ve zehab ve iyabın suhûlet ve suûbetine göre geminin zayi ve telef olduğu veya vusul bulduğu mahalden veyahut telef olduğunun veya mahalline vusulünün elk-i evvel haberi vasıl olan yerden sigorta kontratosı imza olunmazdan mukaddem tanzim olunduğu mahalle behemehal haber gelmesi mümkün idüğü tahakkuk eylediği surette madde-i anifede zikr olunan zann-ı galib hasıl olur.

İki yüz on ikinci madde: Sigorta iyi ve fena bir haber üzerine vaki olmuş ise mevad-ı sabıkada mestur olan zann-ı galib muteber olmayıp kontrato imza olunmazdan evvel sigorta olunan şeyin zayi olduğunu sigorta ettiren kimesne bilmiş veyahut gemi mahalline vardığından sigortacının haberi olmuş olduğu isbat olunmadıkça mezkur kontrato feshe olunamaz.

İki yüz on üçüncü madde: Balada iki yüz onuncu maddede zikri sebkat eden keyfiyet sigorta ettiren kimesne aleyhine isbat olunduğu halde ol kimesne sigortacıya iki kat sigorta harcını tediyeye ve sigortacının aleyhine isbat kılındığı takdirde sigortacı sigorta ettiren kimesneye mukarrer olan sigorta bedelini iki kat olarak redde mahkum olur. Bundan başka ceza kanunnamesi hükmünce cezaları tertib olunmak üzere mahakeme-i cezaiyelerine bakılır.

( Kısım-ı Sâlis )

( Sigorta olunan eşyanın terkine dairdir )

İki yüz on dördüncü madde: Geminin bir kaza-yı bahrîden dolayı gark olduğu veya karaya uğrayıp kırıldığı yahut seyr ü sefere kabil olamayacak bir hale geldiği ve düşman ve korsan tarafından gasb veyahut bir devlet-i ecnebiye canibinden