525

Ol vechile tamir olunduğu takdirde karaya oturmasından neş'et eden masarif ve zarar ve ziyanı sigortacılardan istihsal zımnında sigorta ettirenin hakkı zayi' olmaz.

İki yüz otuz dördüncü madde: Geminin sefere kabil olmadığını ehl-i hibre marifetiyle beyan olunduğu halde hamulesini sigorta ettirmiş olan kimse bunun haberini aldıktan üç gün zarfında keyfiyeti sigortacı tarafına tebliğ ettirmeye mecburdur.

İki yüz otuz beşinci madde: Ol halde emtia-i mahmulenin götürülmesi meşrut olan mahalle nakl ve isaliçün kapudan serian diğer bir sefinenin tedarikine her vechile sa'y ve gayret etmeye mecburdur.

İki yüz otuz altıncı madde: Madde-i ânifede beyan olunduğu üzere emtia-i mezkûre diğer bir sefineye tahmil olunduğu suretde götürülmesi meşrut olan mahalle varıp tahliye olununcaya değin emtia-i mezkûreye ol gemide dahi terettüb edebilecek hatar ve hasar sigortacıya aid olacaktır.

İki yüz otuz yedinci madde: Kezalik emtia ber-vech-i muharrer diğer sefineye tahmil olunduğu halde emtia-i mezkûrenin hasar ve ziyanının ve tahliye masarifi ve mağaza kirası ve tekrar tahmiliye masarifiyle emr-i tahlisi zımnında vuku bulan sair bilcümle masarifine ifasına sigorta olunan meblağ mikdarına kadar sigortacı mecbur ve zamindir.

İki yüz otuz sekizinci madde: Bâlâda mestur iki yüz otuz birinci maddede tayin olunan müddetler zarfında kapudan emtiayı yükletip götürülmesi meşrut olan mahalle nakl için diğer bir sefine bulamadığı takdirde sigorta ettirmiş olan kimse emtiayı başka bir sefineye tahmil için muayyen olan müddetin inkızasından bed' ile iki yüz on yedinci maddede tahsis kılınan müddetler içinde terk edebilecektir.

İki yüz otuz dokuzuncu madde: Sigorta olunan eşya korsan tarafından gasb olunup sigorta ettiren kimse sigortacıya haberini veremediği suretde emr ve ruhsatın tahsiline beklemeyerek eşya-yı mezkûreyi bedel itasıyla tahlis edebilir fakat emr-i tahlisi için korsan ile...