526

Uyuşarak her ne meblağ vermekle mecbur olmuş ise bunu dahi heman fırsat
bulduğu gibi sigortacıya tebliğ etmeğe borçludur.
İki yüz kırkıncı madde — Keyfiyet ol vechile kendisine tebliğ olundukda
sigortacı ister şu uyuşma hususunu kendi hesabına kabul ister
red etmeğe haklı olup bu iki şıkdan her kangısını ihtiyar eder ise anı
uyuşmak keyfiyeti kendisine tebliğ olundukdan yirmi dört saat zarfında
sigorta ettirmiş olan kimesneye resmen bildirmeğe mecburdur. Uyuşma
hususunu kendi hesabına olarak kabul ettiğini beyan eylediği halde
uyuşmanın şeraiti üzere bedel-i tahlisden sigorta olunan eşyaya
isabet eden hisseyi heman te’diyeye mecbur olarak andan sonra dahi sefer
vakıasının hatarları sigorta kontratosu mucibince yine kendisine ait
olacaktır. Mezkûr iki şıkdan kangısını ihtiyar eylediğini müddet-i mezkûrede
sigortacı bildirmediği suretde uyuşmayı kendi hesabına kabul
etmemiş addolunacaktır.

( On İkinci Fasıl )
( Avaryalar ya’ni hasarat-ı bahriye hakkındadır )
( Kısım-ı Evvel )
( Hasarat-ı bahriyenin neden ve kaç nev’den ibaret olduğuna )
( ve ne suretle tesviye olunacağına dairdir )

İki yüz kırk birinci madde — Balâda mestur yüz yetmişinci maddede tehlikât-ı
bahriye hakkında ta’yin olunan müddetin bed’inden hitamına değin gemiye ve emti’a-i
mahmuleye terettüb eden her dürlü hasar ve ziyan ve gemi ve hamulesinin ikisi için
birden yahud her birisi için ayrı ayrı fevkalâde vukubulan cemî’
masarif hasarat-ı bahriyeden addolunur.
İki yüz kırk ikinci madde — Hasarat-ı bahriye iki nev’ olup birine cesîme
ve umumiye ve diğerine dahi âdiye ve hususiye ıtlak olunur.
İki yüz kırk üçüncü madde — Tarafeyn beyninde mukavelât-ı mahsusa olmadığı
halde hasarat-ı bahriye âtîde beyan olunan ahkâm ve şerâita tatbîkan tesviye
olunur.
İki yüz kırk dördüncü madde — Hasarat-ı bahriye-i umumiye gemi ve hamulesinin

selâmeti