534

Mütebakisiyle beraber zayi ve telef olur ise bunların tazmini içün sandallara vaz‘ olunan emtia selametle karaya çıksa bile garmaya dahil olmaz.

İki yüz yetmiş ikinci madde
Bâlâda beyan olunan hususatın cümlesinde garmanın istifasıçün kapudan ve taifenin emtia-i mahmule ve ya esman-ı hasılası üzerine hak-ı imtiyazları vardır binaenaleyh garmanın te’diyesinden istinkaf olundığı halde istifasının te’mini içün emtia-i mezkûreden merkumların hasarat-ı bahriye-i umumiyeden dolayı gerek bizzat kendileri ve gerek bilvokale sair ashab-ı matlub içün ahz idecekleri hisse-i garmaları miktarını zabt ve tevkif ve mahkemenin hükmiyle füruht etdirmek salahiyetleri vardır.

İki yüz yetmiş üçüncü madde
Denize ilka olunan eşya tevzi-i garmadan sonra sahibleri tarafından tahlis ve istihsal olundığı takdirde ilka hususundan dolayı eşya-i mezkûreye tertib iden zarar ve tahlisi içün virilen masarif ba‘de’t-tenzil kusur kalan akçeyi eşya sahibleri kapudana ve sair alakası olan kimesnelere iadeye mecburdurlar bu halde iade olunan akçe geminin sahibleriyle hamuleye alakası olanlar beyninde ilka hususundan tertib iden zarar içün virdikleri hisse-i garmaları mikdarına göre tevzi ve taksim olunur.

( On üçüncü fasıl )
( Mürur-ı zaman bahsine dairdir )

İki yüz yetmiş dördünci madde
Mürur-ı zaman ile kapudan süvar oldığı sefinenin hiç bir vakit malik ve sahibi olamaz.

İki yüz yetmiş beşinci madde
Sigortacıya terk-i eşya salahiyeti iki yüz on dördünci maddede muayyen olan vakit ve zamanın müruruyla sakıt olur.

İki yüz yetmiş altıncı madde
İstikraz-ı bahri kontratosu ve ya sigorta senedi tarihlerinden beş sene mürurında bunlardan tevellüd iden dava müddeinin hasmı tarafından mürur-ı zaman ile def‘ olunur.