553

kanuniyesini gördükden sonra ikinci defa olarak tekrar bu fazahati irtikab eylediği halde almış olduğu rüşvet kendüsünden iki kat olarak istirdad birle kendüsü beş seneden eksik olmamak üzere muvakkaten kalebend kılınub müebbeden rütbe ve memuriyetden mahrumiyet cezası dahi beraber hükm olunur.

Yetmiş beşinci madde: Mükerrer olan raşi ve raiş dahi kezalik beş seneden eksik olmamak üzere kalebend kılınub müebbeden rütbe ve memuriyetden mahrumiyet cezası dahi beraber hükm olunur.

Yetmiş altıncı madde: Rüşvet olarak henüz akçe ve eşya alınub verilmiş olmayıb da fakat ol babda sened veyahud tahvil verilmiş veyahud sened dahi alınmayarak rüşvet taatisi üzere yalnız bir mukavele-i mahsusa vuku bulmuş olduğu ve bu mukavelenin fiile çıkmaması raşi ve mürteşinin def'ine muktedir olamadıkları ba'zı mevaniden neş'et eylediği bi'l-muhakeme sabit ve muhakkak olur ise bu makule mukavelelere bi-aynihi rüşvet alınub verilmiş nazariyle bakılub bunı irtikab olanlar haklarında mürteşi ve raşi ve raiş cezaları icra olunur şu kadar ki bu halde cezayı nakdi olmak üzere mukavele olunmuş olan rüşvet mikdarı akçe raşiden ve bir misli dahi mürteşiden ahz ve tahsil olunur.

Yetmiş yedinci madde: Bir adem can ve mal ve ırzını ve'l-hasıl menfaat-i meşruasını muhafaza içün birine rüşvet vermeğe hakikaten mecbur ve muztarr olur da ba'de keyfiyeti canib-i hükümete haber verir ise vermiş olduğu akçe bi'l-istirdad kendüsine ita olunub bu rüşveti almış olan şahs hakkında mürteşi cezası icra olunur ve bu adem öyle mecburen verdiği rüşveti bir vech-i muharrer vaktiyle yani sebeb-i mecburiyet ve kendüsünce olan havf ve haşyet mürtefi' olduğu anda Dersaadet'de ise ba-arzuhal makam-ı ali-i sadarete ve taşralarda bulunduğu takdirce vali ve mahalleri meclislerine haber vermeyüb de ahar tarafdan duyulduğu takdirde adeta raşi cezasiyle mücazat kılınur.

Yetmiş sekizinci madde: Bir ademin hakka makrun bir işi olub da anın rü'yet ve tesviyesi zımnında müracaata mecbur olduğu memur tarafından akçe