566

Mekâtibi küşâd iden ve itdiren me'mûrlar ve bi'l-hâssa buna ma'lûmâtı olan posta me'mûrları bir Mecîdiye altınından beş Mecîdiye altınına kadar cezâ-yı nakdî alındıktan başka bir aydan üç seneye kadar habs olunur.

( Onuncu Fasıl )

( Salâhiyet ve me'zûniyeti olmaksızın sıfat-ı resmiyede bulunanlar )

Yüz otuzuncu mâdde: Her kim Devlet-i 'Aliye'den salâhiyet ve me'zûniyeti olmaksızın hod-be-hod bir me'mûriyet-i mülkiye ve 'askeriye sıfatında görünür veyâhud bu me'mûriyetlere müteferri' mevâddı icrâ eyler ise üç aydan eksik olmamak üzere habs cezâsıyla mücâzât olunur ve bu harekete mütecâsir olan sahte fermân-ı 'âlî ve emrnâme-i sâmî ve buyuruldu misillü evrâk-ı resmiye irâe ve neşriyle sahtekârlığa cür'et ider ise hakkında on beşinci fasılda beyân olunacağı vechle sahtekâr cezâsı dahi ayrıca hükm ve icrâ kılınur.

Yüz otuz birinci mâdde: Taraf-ı Devlet-i 'Aliye'den nâil ve me'zûn olmadığı nişânı takan ve kendü rütbesinin mâ-fevkinde elbise-i resmiye giyen veyâhud hîç rütbe ve me'mûriyeti olmadığı hâlde üniforma telebbüs eyleyen eşhâs üç aydan bir seneye kadar habs ile te'dîb olunur.

( On Birinci Fasıl )

( İmtiyâzât-ı mezhebiyeye ta'arruz idenler ile ba'zı âsâr-ı kadîme )
( ve mu'tebereyi tahrîb ve rahnedâr idenlere dâirdir )

Yüz otuz ikinci mâdde: Sunûf-ı teb'a-i şâhânenin devletçe icrâsına me'zûn oldukları resm ve âyînlerine bir kimse tarafından ta'arruz vukû' bulur veyâhud bunların icrâsına fi'len ve tehdîden memâna'at vukû'a gelir ise ol kimse derece-i mu'âmelesine göre bir haftadan üç aya kadar habs ile te'dîb olunur.

Yüz otuz üçüncü mâdde: Hayrât-ı şerîfe ve tezyînât-ı belediyeden olan ebniye ve âsâr-ı mevzû'ayı hedm ve tahrîb veyâhud ba'zı mahallerini kırub rahnedâr iden ve cevâmi' havlilerinde ve seyr yerlerinde ve esvâk ve meydânlardaki ağaçları kat' ve telef eyleyen olur ise zararları tazmîn itdirildikten sonra bir aydan

bir seneye