572

Yüz elli yedinci madde
Yol emri ve mürur tezkeresi ve pasaportayı sahte olarak yapan veyahut sahih olan böyle bir yol kâğıdını tağyir ve tahrif eden ve bu makule sahte ve tağyir ve tahrif olunmuş evrakı istimal eyleyen eşhas bir seneden üç seneye kadar haps olunur.

Yüz elli sekizinci madde
Hancı ve kahveci ve bekâr odacısı ve lokantacı ve sair bu misillü icare-i yevmiye ile şunu bunu iskân eden kimseler oda ve sükna verdikleri eşhasın sahih isimlerini bildikleri halde nam-ı diğerle sahte olarak deftere kayd ettirir ise bir aydan üç aya kadar haps olunur.

Yüz elli dokuzuncu madde
Mer'i olan usul ve nizamı iktizasınca kefalete rabt etmeksizin mürur tezkeresi veren memurlar memuriyetlerinden azl ve altı aydan bir seneye kadar hapis ile mücazat olunur bu misillü memurin verecekleri yol kâğıdlarını bilerek sahte isim yazar ise altı aydan iki seneye kadar haps olunur.

Yüz altmışıncı madde
Her nevi hidemat-ı devletten kendini veyahut aharini muaf ettirmek üzere etibba ve cerrah namına olarak illet-i vücudiyesini mutazammın sahte şehadetname yapan şahıs bir seneden üç seneye kadar haps olunur.

Yüz altmış birinci madde
Tabib ve cerrahlardan her kim birinin iltimasına mebni veyahut hatıra riayet hizmet-i devletten muaf ettirmek için aslı olmayarak marazı ve illeti vardır deyu şehadet eder ise bir seneden üç seneye kadar haps olunur ve eğer bu sahtekârlığı akçe ve hediye ahziyle irtikâb etmiş ise hakkında mürteşi cezası ve akçe veren hakkında dahi raşi cezası icra olunur.

Yüz altmış ikinci madde
Her ne dürlü sahte ve taklid şey olur ise olsun bilmeyerek istimal edenler cezadan ma'füv tutulur.