576

Carih ve daribin yed-i ihtiyarında olmayan esbab-ı mania hayluletiyle madde-i katl fi'le çıkmamış idüği tebeyyün eyler ise yare ve beresi gerek ağır olsun ve gerek hafif olsun mevadd-ı selâse-i sabıkada beyan olundığı vechle cerh ve darbın derecesine göre hükm olunacak diyet yahud mikdar-ı ma'lum meblağ ile masarif-i cerrahiyesi istifa olunduktan sonra carih ve darib olan kimse her halde muvakkaten küreğe konulur.

(Fi 3 Cemaziyelahir sene 1277 zeyl)
(Mücerred katl kasdıyla silah çeküb de yed-i ihtiyarında olmayan esbab-ı mania hayluletiyle madde-i katl fi'le çıkmamış idüği tahakkuk edenler kezalik muvakkaten küreğe konulur)

Yüz seksen birinci madde: Katl ve cerh ve darb fiilleri bir gûne ihtilal ve nehb ve garet-i emval ile beraber icra olunur ise bunlara bilhassa cesaret edenlerin görecekleri mücazatdan başka bu hal-i ihtilalin sebeb ve muharrik ve mucibi olanlar dahi aynıyla bu fiilleri işlemiş gibi mücazat olunurlar fakat emr-i kısasda hükm-i şer'i ne ise icra olunur.

Yüz seksen ikinci madde: Bir kimse bir şahsı hataen itlaf eder yahud bi-gayr-i kasd telef-i nefsine sebeb olur ise verese-i maktulün hukuk-ı şer'iyesi bi'l-muhakeme istifa olunduktan sonra eğer bu katl keyfiyeti dikkatsizlikden ve nizamata riayetsizlikden neş'et etmiş ise altı aydan iki seneye kadar habs ile mücazat olunur.

Yüz seksen üçüncü madde: Bir kimse bir şahsı hataen cerh ve darb eder yahud bi-gayr-i kasd yarelenmesine sebeb olur ise masarif-i cerrahiyesi ve bir uzvun kat' ve ta'tilini mucib olduğu takdirce diyet-i şer'iyesi istifa olunduktan sonra eğer bu cerh ve darb keyfiyeti dikkatsizlikden ve nizamata riayetsizlikden neş'et etmiş ise bir haftadan iki aya kadar habs dahi olunur.

Yüz seksen dördüncü madde: Bir kimse amir-i mücbirin emriyle bir şahsı katl etse de katil cezası amiri hakkında icra olunur amir-i mücbir memuru emrine muhalefet ettiği takdirce itlafa muktedir olan kimse demekdir bundan maada suretlerde...