578

Yüz doksan birinci madde: Bir şahs, kendisine yâhud ta’yîn etdiği bir mahalle nakd akçe veyâ ba’zı eşyâ göndermesini veyâ sâir metâlib ve tekâlîfi hâvî bir kimesneye mühürlü yâ mühürsüz ve imzâlı yâ imzâsız kâğıd irsâl ederek veyâhud adam göndererek istediğini göndermez veyâ teklîfini icrâ eylemez ise hakkında ba’zı mazarrat vukûa getireceği beyânile ihâfe ve tehdîd eder ve beyân etdiği mazarrat fâili hakkında kânûnen i’dâm yâ müebbed kürek cezâsını mûcib olub fakat fi’le çıkmamış bulunur ise bu nev’ cinâyete mücâsir olan şahs muvakkaten küreğe konulur ve eğer icrâ edeceği ihbâr eylediği mazarrat kânûnen bâlâda zikr olunan cezâları mûcib olacak cinâyetlerden olmayub da daha hafîf nev’lerden olur ve kezalik fi’le çıkmamış bulunur ise şahs-ı merkûm bir seneden üç seneye dek habs olunur ve kendisinden üç mecidiye altunından yirmi mecidiye altunına kadar cezây-ı nakdî alınır.

( İkinci Fasl )

( İskât-ı cenîn ve karışık meşrûbât ve kefilsiz semmiyyât fürûht )
( edenlerin mücâzât-ı mürettebeleri )

Yüz doksan ikinci madde: Bir kimesne darb yâhud sâir gûne bir fi’l ile bir hâmile hâtunun iskât-ı cenîn eylemesine sebeb olur ise diyet-i şer’iyyesi istîfâ olundukdan sonra eğer bu ta’addîsi an kasd olmuş ise muvakkaten küreğe konulur.

Yüz doksan üçüncü madde: Bir hâmile hâtunun gerek rızâsı olsun ve gerek rızâsı olmasun iskât-ı cenîn etdirmek içün ilâc içirüb yâhud esbâb ve vesâilini ta’rîf edüb de eseriyle çocuğu düşürülür ise buna sebeb olan kimse altı aydan iki seneye kadar habs olunur ve eğer buna sebeb olan tabîb ve cerrâh ve eczâcı ise muvakkaten küreğe konulur.

Yüz doksan dördüncü madde: İtlâf-ı nefs etmeyüb ancak kasden ba’zı şeyler i’tâsiyle bir âdemin hastalığına yâhud bir mikdâr kâr ve kesbiyle meşgûl olamamasına sebeb olan şahs bir mâhdan bir seneye kadar habs olunur.

* ve üç *