579

... üç Mecidiye altınından yirmi beş Mecidiye altınına kadar tazmin akçesi alınıp müteessir olan âdeme verilir.

Yüz doksan beşinci madde: Yedinde şehâdetnâmesi olmayarak eczacı dükkânı açan eczacıların ibtidâ dükkânı kapatdırıldıktan sonra on Mecidiye altınından elli Mecidiye altınına kadar cezâ-yı nakdî ahzıyla mücâzât olunur.

Yüz doksan altıncı madde: Sıhhat-ı umûmiyeyi ihlâl edecek eczâ-yı muzırra ve karışık meşrûbât ve kefâletsiz semmiyyât fürûht edenler bir haftadan iki seneye kadar habs olunur ve bir Mecidiye altınından yirmi beş Mecidiye altınına kadar cezâ-yı nakdî alınır ve sattığı eşyâ her ne ise cânib-i hükûmetden zabt olunur.

( Üçüncü Fasıl )

( Hetk-i ırz edenlerin mücâzâtı beyânındadır )

Yüz doksan yedinci madde: Her kim on bir yaşından aşağı bir çocuğa fi‘l-i şenî‘ icrâ eyler ise altı aydan akall olmamak üzere muvakkaten habs cezâsıyla mücâzât olunur.

Yüz doksan sekizinci madde: Bir âdem bir kimseye cebran fi‘l-i şenî‘ icrâ eder ya‘ni ırzına geçer ise muvakkaten küreğe konulur.

( Fî 3 Cemâziyelâhir sene 1277 Zeyl )

( Böyle cebran fi‘l-i şenî‘ icrâsına tasaddî edip de yed-i ihtiyârında olmayan esbâb-ı mâni‘a haylûletiyle fi‘le çıkmamış olur ise üç aydan akall olmamak üzere habs cezâsıyla mücâzât olunur )

Yüz doksan dokuzuncu madde: Cebran fi‘l-i şenî‘ icrâsı buna dûçâr olanların üzerine hükümleri cârî olan mürebbîleri veyâhud velîleri veyâhud aylıklı hizmetkârları taraflarından vukû bulur ise beş seneden akall olmamak üzere kürek cezâsı hükm olunur.

İki yüzüncü madde: Eğer böyle cebran fi‘l-i şenî‘ henüz bir ere tezvîc olunmamış kız hakkında vukû bulur ise buna mütecâsir olan kimse işbu kürek cezâsından başka tazmin vermeye dahi müstahak olur.