582

Tevkif olunan şahs idam ile ihafe olunmuş veyahut hakkında cismen eziyet ve işkence edilmiş ise buna cesaret eden şahs her halde muvakkat kürek cezasına müstahak olur.

İki yüz beşinci madde: Bir sabînin yerine diğerini koyarak değiştirmek veyahut bir hatunun tevlid etmemiş olduğu çocuğu ondan tevellüd etmiş yerine koymak gibi fazahatlere ictisar edenler altı aydan üç seneye kadar habs olunur.

Bir sabîyi sirkat veyahut gaib eden kimse dahi kezalik altı aydan üç seneye kadar habs ile mücazat kılınır. Ancak bu müddet zarfında sabîyi meydana çıkarmaz ise sabîyi getirmedikçe veyahut sabînin vefatını tahakkuk etmedikçe habsden ıtlak olunmaz.

İki yüz altıncı madde: Her kim sinn-i büluğa varmamış bir çocuğu cebr veyahut hile ile bir tarafa kaçırır ise üç aydan bir seneye kadar habs olunur. Ve eğer bu suretle kaçırılan çocuk hadd-i büluğa varmamış bir kız ise kaçıran şahs muvakkaten küreğe konulur.

Ve eğer kaçırılan kız hakkında fi’l-i şenî’ icra olunmuş ise bunu mürtekib olanlar haklarında o fiil için muayyen olan cezanın münteha-yı derecesi icra olunur. Ve bir kız kaçırıldığı halde nikâh vuku bulmuş ise iktiza-yı şer’îsi üzere hareket olunur.

(Fî 3 Cemâziye'l-âhır sene 1277 Zeyl)

(Her kim bir bâliğayı cebren kaldırıp kaçırır ise üç aydan üç seneye kadar habs olunur ve fakat kocası var ise kaçıran kimse muvakkaten küreğe konulur. Her kim bir bâliğanın veyahut bir gayr-i bâliğanın cebren kaldırılıp kaçırılması emrinde kaçıran adama muavenet eyler ise bir aydan altı aya kadar habs olunur.)

( Beşinci Fasıl )

( Yalan şahidliği ve yalan yere yemin edenlerin cezaları )

İki yüz yedinci madde: Cinayata müteallik mevadd ile müttehem olan kimsenin gerek lehinde ve gerek aleyhinde yalan şahidliği eden şahs ba’de’t-teşhîr muvakkaten küreğe konulur. Ve eğer azv-i cinayat ile müttehem olan kimse anın şehadet...