595

Ve ale’l-bir cinayet ve feryad-ı umumi ve şikayet vukuunda talep olunan hizmet ve muavenete muktedir olduğu halde istinkaf ve müsamaha eyleyenler altı beşlikden on beşliğe kadar ceza-yı nakdi ahzıyla mücazat olunurlar.

İkiyüz elli yedinci madde
Tenevvülü sıhhat-ı vücuda muzır olan veyahut dükkanlarda kalıp çürüyerek taaffün eyleyen meyve ve saire bahr veyahut nehre veyahut haric-i şehre tarh ve ilka ettirildikten başka bunları satanlardan kezalik altı beşlikden on beşliğe kadar ceza-yı nakdi alınır.

İkiyüz elli sekizinci madde
Bil-ihtiyar bir adamın üzerine veyahut hanesine veyahut ebniye-i sairesine ve havlisine ve bahçesine taş ve sair ecsam-ı sulbe veyahut pislik atanlar ve hakk-ı duhulü olmayan mahalle girenler ve hakk-ı mürûru olmayan yerden mürûr edenlerden kezalik altı beşlikden on beşliğe kadar ceza-yı nakdi ahz olunduktan başka yirmi dört saatden beş güne dek hapis dahi olunurlar.

İkiyüz elli dokuzuncu madde
Diğerlerinin emval-i menkulesine bil-ihtiyar iras-ı hasar edenler ve deli veyahut muzır ve yırtıcı hayvanatı salıvermekle veyahut hadden aşırı koşturmak veyahut yük yükletmek veyahut taş ve sair ecsam-ı sulbe atmak veyahut bir mahalli kazmak ile bir kimsenin hayvan ve davarının helakine ya mecruhiyetine sebep olanlar ba’de’t-tazmin on beşlikden on beş beşliğe kadar ceza-yı nakdi ahzıyla mücazat olunurlar.

İkiyüz altmışıncı madde
Ahalinin rahatını selb edecek suretde bila-mucib gürültü ve şamata edenler ve emr-i hükümet ile yapıştırılmış olan ilanates evrakını bil-iltizam koparanlar ve yırtanlar kezalik on beşlikden on beş beşliğe kadar ceza-yı nakdi ahz ve üç günden bir haftaya kadar hapis ile mücazat olunurlar.

İkiyüz altmış birinci madde
Bir kimsenin muhraz veyahut mezru olan veyahut içinde mahsulat ve mezruat bulunan arazisine ve bağ ve bahçesine hayvan salıveren kimse kezalik on beşlikden on beş beşliğe kadar ceza-yı nakdi ahzıyla mücazat olunur ve zarar ve ziyan tazmin ettirilir.