596

İkiyüz altmış ikinci madde: Dükkân ve mağazasında ve çarşı ve bazarda ve panayırlarda eksik dirhem ve fasid kantar ve terazi ve nâkıs ölçü ve kile saklayan ve nizamen muayyen ve müstamel olan vezn ve ölçüden başka vezn ve ölçü kullanan şahıslardan o makule vezn ve ölçüler ahz ve zabt olunduktan sonra on beşlikten on beş beşliğe kadar cezayı nakdî alınır.

İkiyüz altmış üçüncü madde: Nizamen tayin ve ilan olunan narhından ziyadeye eşya satanlar kezalik on beşlikten on beş beşliğe kadar cezayı nakdî ahz ve yirmi dört saatten üç güne kadar hapis ile mücazat olunur. Ve eğer bu vechile narhından ziyade sattığı eşya nan ve lahm ve odun ve kömür gibi nâsın havaic-i zaruriyesinden ise üç günden bir haftaya kadar hapis olunur ve on beş beşlikten yirmi beşliğe kadar cezayı nakdî alınır.

İkiyüz altmış dördüncü madde: Turuk-ı ammeyi ve meydan ve seyr yerleri gibi menafi-i amme için terk ve tahsis kılınmış olan yerleri bozan ve tul ve arzından çalan kimseden bozduğu yerin masarif-i tamiriyesi ahz ve istifa ve aldığı yer istirdad olunduktan sonra üç günden bir haftaya kadar hapis ve on beş beşlikten yirmi beşliğe kadar cezayı nakdî ahz ile mücazat olunur.
Fî 28 Z sene 1274

( Zeyl ) İrade-i seniyye tarihi fî 7 Muharrem sene 1286
ve fî 7 Nisan sene 1285

( Nizamen memnu olan mahalle meyyit defn eden ve ettiren ve defnine ruhsat verenler bir mahtan bir seneye kadar hapis ve bir yüzlük Osmanlı altınından on aded yüzlük Osmanlı altınına kadar cezayı nakdî ile mücazat olunur )

Cinayet