604

(Memurîn muhakemesine dair nizamnamedir)

Birinci Madde — Memurînden birinin memuriyetinden dolayı ceza tertibini müstelzim fiil ve hareketi vukuunda ol memur ibtida mensub olduğu nezaret veya idarece istintak olunur ve istintakname kendisine temhir ve imza ettirildikten sonra zeyline istintakın fezlekesi ve tahkikat-ı vakıanın hulasası yazılarak anın ziri dahi istintaka memur olanlar tarafından mühürlenir.

İkinci Madde — Memur-ı müttehemin mensub olduğu nezaret veya idarece icra edilecek istintakı tahkikat-ı evveliye itibar olunur ve tahkikat-ı evveliye medar-ı hüküm olmayıp yalnız medar-ı muhakeme add idilir.

Üçüncü Madde — Tahkikat-ı evveliye varakası mevad-ı âtiyede beyan olunan usul vechle muhakemenin taalluk edeceği meclise havale olunur ve alel-umum esna-yı muhakemede memur-ı mesulün müteallik olduğu nezaret veya idare canibinden müddei sıfatıyla bir memur bulundurulur.

Dördüncü Madde — Zabtiye neferatı ve rüsumat kolcuları ve gardiyan misillü efraddan bulunan ve hademeden ma’dud olan memurların hizmet-i memurelerinden dolayı muhakemeleri lazım geldikde töhmetleri bir aya kadar hapsi veya iki yüzlük altunu kadar ceza-yı nakdîyi veya tazmini müstelzim ise kaza idare meclislerinde rüyetle hükümleri icra kılınır ve bir aydan bir seneye kadar hapsi ve iki yüzlük altundan beş yüzlük altuna kadar ceza-yı nakdî ve tazminatı mucib ise kaza meclislerinde rüyet olunup hükümleri liva idare meclislerinin tasdikiyle icra kılınır ve bir seneden üç seneye kadar hapis cezasını ve beş altundan ziyade ceza-yı nakdî ve tazminatı müstelzim ise liva idare meclislerinde rüyetiyle hükümleri vilayet idare meclislerinin kararıyla icra olunur ve andan yukarı cezayı icab eden töhmetlerin muhakemeleri meclis-i idare-i vilayette rüyet olunup hükümleri Bâb-ı Âlî’den istizan kılınır.

Beşinci Madde — Dördüncü maddede beyan olunan müstahdemînin fevkinde bulunan memurînden birinin memuriyetinden dolayı muhakemesi lazım geldikde zabtiye yüzbaşısı ve teftiş memuriyeti derecesine muadil rütbede ise taht-ı muhakemeye
[alınması]