610

On üçüncü madde: Valinin maiyetinde bir idare meclisi olup işbu idare meclisi suret-i tayini fasl-ı sanide beyan olunacak müfettiş-i hükkâm-ı şer’iye ve defterdar ve mektupçu ve hariciye müdürü ve ikisi müslim ve ikisi gayr-i müslim ahaliden müntehab kimselerden mürekkeb olacak ve meclis-i idarenin riyaseti valide olup gıyabında memurinden hangisini tensib ve tayin eder ise o vekâlet edecektir (1)

On dördüncü madde: Meclis-i idare umur-ı mülkiye ve maliye ve hariciye ve nafıa ve ziraate dair mevaddın icraatına aid olan müzakerata memur olup umur-ı hukukiyeye müdahale etmeyecektir ve işbu meclisin usul-i müzakeratı ve kararlarının suret-i icrası nizamname-i mahsus ile tayin olunacaktır.

On beşinci madde: Vilayetin umur-ı zabıtası umumen vali-i eyaletin emri altında olarak işbu kuvvetin elviye ve kazaya taksimi ve icabına göre bir mahalden diğerine nakli valinin emrine muhavveldir. Umumen kuvvet-i zabıtanın miralayı derecesinde alaybeyi unvanıyla bir büyük zabiti olup işbu zabit valinin emri altında olarak asâkir-i zabıtanın nizamatını icraya memurdur.

( Fasl-ı Sani )
( Umur-ı Hukukiye )

On altıncı madde: Dahil-i vilayette bulunan kâffe-i mehakim-i şer’iyenin müfettişi ve merkez-i hükümet-i seniyyeye takdimi lazım gelen ilâmât ve sair vesaik-i şer’iyenin mümeyyizi olmak üzere makam-ı celil-i fetvanın intihabıyla taraf-ı eşref-i hilâfetpenâhîden mensub bir müfettiş-i hükkâm-ı şer’iye olacaktır (2)

On yedinci madde: Müfettiş-i hükkâmın mehakim-i şer’iye üzerine cari olacak ahkâm-ı teftişiye ve saire vezaifi taraf-ı meşihatpenâhîden tastir olunacak tenbihname ile tayin kılınacaktır.

(1) Karar-ı ahir icabınca müfettiş-i hükkâmlık memuriyeti ilga olunmakla vazifesi merkez naibine verilmiştir.
(2) Karar-ı ahir icabınca müfettiş-i hükkâmlık memuriyeti ilga olunmakla vezaifi merkez naibine verilmiştir.

On sekizinci