614

Mâmur olduğu gibi tayin olunan mâzuniyet hududu dahilinde ahkâm-ı dahiliye-i livâyı icraya mâmurdur (1)

Otuzuncu Madde Sancağın umur-ı maliye ve hesabiyesi muhasebeci nam ve unvanıyla vilayet defterdarı mercii olmak ve Maliye Nezaret-i Celîlesi’nin intihabıyla taraf-ı devletten nasb olunmak üzere bir mâmura muhavveldir (2)

Otuz Birinci Madde Umur-ı maliye ve hesabiyede mutasarrıfa aid olan vezaif ile muhasebeciye aid olan vezaif nizamname-i mahsus ile tayin olunacak ve livanın umur-ı hesabiyesi muhasebecinin zir-i idaresinde olmak ve vilayet defterdarı tarafından tavsiye kılınan usulde hareket eylemek üzere bir mal kalemine ihale kılınacaktır.

Otuz İkinci Madde Livanın umur-ı tahririyesi liva tahrirat müdürü namıyla taraf-ı devletten mansub bir mâmura muhavvel olup ve maiyetinde bir tahrirat kalemi bulunup livanın kâffe-i mekatibat-ı resmiyesi ve evrakının ve kuyudunun muhafazası bu vasıta ile icra kılınacaktır.

Otuz Üçüncü Madde Mutasarrıf-ı liva maiyetinde bir idare meclisi olup makarr-ı kaymakamı olan kazanın hâkimi ve müftü-i belde ve ahali-i gayr-ı müslimenin reis-i ruhanileri ve muhasebeci ve tahrirat müdürü ve ikisi müslim ve ikisi gayr-ı müslim dört azay-ı dâimîden mürekkep olacaktır ve meclis-i idarenin riyaseti mutasarrıfda olup gıyabında mutasarrıf her hangisini tensib ve tayin eder ise o vekâlet edecektir.

Otuz Dördüncü Madde Meclis-i idare umur-ı mülkiye ve maliye ve zabtiye ve tahsiliye ve nâfia ve mahlûlât ve tapu ve ziraate dair mevadın icraatına aid olan umura mâmur olup umur-ı hukukiyeye müdahale etmeyecektir ve işbu meclisin usul-ı müzakeratı ve kararlarının suret-i icrası nizamname-i mahsus ile tayin olunacaktır.

(1) Karar-ı ahir icabınca merkez-i vilayet olan sancakda mutasarrıf olmayıp bizzat vali idare eder.
(2) Merkez-i vilayet olan liva muhasebeciliği mülga olup vazifeleri defterdara ilave-i mâmuriyet edilmiştir.

Otuz Beşinci