635

( İdare-i Umumiye-i Vilâyât Nizamnamesidir )
( Mukaddime )

Vilâyâtın teşkilât-ı esasiyesi bin iki yüz seksen bir senesi şehr-i Cemaziye'l-ahiresinin yedisi tarihiyle müverrahan ilân kılınan nizamname ile tayin kılınmış ve mehakim-i nizamiye içün nizamname-i mahsus vaz' ve te'sis edilmiş olduğundan işbu nizamname idare-i mehakimden bahs etmeyip yalnız memurîn-i icraiye ve mecalis-i idare ve belediyenin ve nevahi idarelerinin vezaifini tayin eder.

( Bab-ı Evvel )
( Vilâyâtın aksam-ı idaresi beyanındadır )

Birinci Madde: Vilâyetler livalara ve livalar kazalara ve kazalar nahiyeye ve nahiyeler karyelere münkasim olup idare-i umumiyesinin reîs ve mercii vali-i vilâyettir.

İkinci Madde: Her şube-i idarede bulunan memur vazife-i memuriyetince birinci derecede ma-fevkindeki memur nezdinde mes'ul olup her memura derece-i ibtidaiyede raci olan mes'uliyet dahi müselselen vali-i vilâyete kadar müntehi olur.

Üçüncü Madde: Vilâyetin şubat-ı idaresini terkib eden heyet-i memurîn-i icraiye muavin ve defterdar ve mektubcu ve umur-ı ecnebiye ve ticaret ve ziraat ve maarif müdürleri ve tarik eminleri ile defter-i hakanî ve emlak ve nüfus ve evkaf idarelerinin reîsleri ve alay beyinden mürekkebdir. Liva idaresinin reîs ve mes'ulü mutasarrıf olup heyet-i memurîn-i icraiyesi muhasebeci ve tahrirat müdürü ve defter-i hakanî memurundan ve liva heyet-i zabıtasının amirinden ibarettir. Kaza idaresinin reîs ve mes'ulü kaymakam olup heyet-i memurîn-i icraiyesi kaza kâtibiyle defter-i hakanî ve emlak ve nüfus ketebesinden ve kaza heyet-i zabtiyesinin amirinden ibarettir. Nahiye idaresinin reîs ve mes'ulü müdür olup idare-i zabıtası nahiyenin heyet-i zabıtasına muhavveldir. Karye idaresinin memuru muhtarlar olup umur-ı hükümet ve zabıtanın reîs ve mes'ulü zabıta memurudur.

79