639

İnşaat içün nahiye müdirine malûmat itâsı ve bekçi ve korucu ve sâir nam ile
karye zâbıtasında bulunmak üzere ihtiyar meclisleri tarafından intihab olunacak
ademlere nezaretle kendilerine havale olunan umûr ve mesâlih-i sâirenin icrâsı
maddeleridir.

( Bâb-ı Râbi )
( Mecâlis-i İdare Beyanındadır )

Altmış birinci madde
Her vilâyetin idare-i umumiye ve hususiyesine müteallik
olup fusûl-i âtiyede envâ ve müfredâtı beyan kılınan işleri müzakereye
me'mur mecâlis senede bir kere merkez-i vilâyette içtima edecek meclis-i umumi ile
suret-i dâimede mün'akid vilâyet ve livâ ve kaza idare meclisleridir bunlardan başka
karyelerde umûr-i kurâyı ve nahiyelerde umûr-i nahiyeyi ve şehir ve kasabalarda her milletin
menâfi ve mesâlih-i mahsusasını ve umûr-i âdiye-i belediyeyi rü'yet etmek içün
ayrı meclisler dahi vardır.

( Fasl-ı Evvel )
( Meclis-i Umûmînin Vezâifi )

Altmış ikinci madde
Meclis-i umûmî turuk ve maâbirin tesviyesini ve bir sene
zarfında vilâyetçe yapılması elzem görünen yolların mesâfât ve derece-i ameliyat
ve masârifâtı hakkında nizâm-ı mahsus mûcibince yapılacak cedvellerin ahkâm
ve mündericâtını ve ticaret ve sanayiin teshil ve terakkisini ve maârif ve terbiyenin intişârını
ve verginin kemiyet-i asliyesine halel gelmemek üzere taksim ve ta'dilini ve yeniden
tekâlif vaz'ı ve her nevi hubûbât tohumunun ve hayvanât cinsinin ıslahını
ve alel-umûm esbâb-ı ma'muriyetin tahrîsini ve meydan ve çayır ve mera misillü menâfi-i
umûmiyeye müteallik olan emlâk-ı umûmiyenin bey' ve şirâ ve mübadelesini ve hastahane
ve ıslahhane gibi ebniye-i umûmiyenin tağyir ve tecdidini ve bunların keyfiyet-i idaresini
ve menâfi-i umûmiyeye dâir arz olunan taahhüdât ve mukavelât ve anların masrafına
müteallik iânât ve ameliyât-ı fevkalâde ile vücuda gelecek te'sisât-ı nâfıanın
suret-i icraiyesini müzakere eyler.

Altmış üçüncü madde
Meclis-i umûmî her sene tekâlif-i seneviye-i vilâyetin tevzi
defterlerini ve ta'dil ve tesviye-i emvâl-i mürettebe hakkında livâ idare meclislerinden
tanzim olunan mazbataları rü'yet eyler.