640

Altmış dördüncü madde: Kazanın ta'dil ve tekâlifine dair istidalar meclis-i idare-i elviyede tetkik olunduktan sonra meclis-i umumîde rüyetle karar ve neticesi der-devlete bildirilir.

Altmış beşinci madde: Vilayetin tekâlifi tezyid olunduğu halde meclis-i umumî tekâlif-i munzammanın taksimini taraf-ı hükümetten sadır olan evamir-i mahsusa üzerine müzakere eyler.

Altmış altıncı madde: Meclis-i umumî mevad-ı sabıkada musarrah mesalih haricinde Bâb-ı Âlî veya vali tarafından müzakeresine ta'lik ve havale olunan her nevi mevad hakkında dahi ita-yı re'y eder.

Altmış yedinci madde: Her vilayetin meclis-i umumîsi icabat-ı mahalliyeye göre münasib olan mevsimde içtima eder ve teşkilat nizamnamesinin yirmi altıncı maddesinde muharrer olduğu üzere meclis-i umumînin zaman-ı in'ikad ve içtimaı kırk günü tecavüz edemez.

Altmış sekizinci madde: Meclis-i umumî icab-ı maslahata göre umumî veyahut hususî heyette olarak icra-yı müzakerata memurdur.

Altmış dokuzuncu madde: Meclis-i umumî akdinde vali-i vilayet mani-i kavisi olup da bizzat bulunamadığı halde bilvekâle memurîninden biri riyaset eder. Meclis-i hususî akdinde dahi heyet-i mevcudeden valinin intihab edeceği zatın taht-ı riyasetinde olarak icra-yı müzakerat olunur.

Yetmişinci madde: Meclis-i umumî azasının sülüsânı bulunmadıkça icra-yı müzakerat olunamaz.

Yetmiş birinci madde: Mevad-ı hususiye her milletin hukuk ve mesalih-i mahsusalarına aid şeyler olup bunlar meclis-i umumîden müfrez heyet-i hususiyede müzakere kılınır.

Yetmiş ikinci madde: Meclis-i umumînin heyet-i umumiye ve hususiyesi müzakeratına hariçten kimse dahil olamaz.

Yetmiş üçüncü madde: Meclis-i umumî turuk ve emlak ve maarif-i umumiye ve mevad-ı ticaret ve ziraat hakkında sene-i sabıka ve âtiyeye müteallik cereyan edecek tetkikat...