643

Seksen ikinci madde: Meclis-i idarenin mevad-ı cezaiyede beş aza hazır olmadıkça ve devair-i saire ve umur-ı idarede heyetin nısfından ziyadesi bulunmadıkça müzakerata salahiyeti olamaz.

Seksen üçüncü madde: Meclis-i idarenin mevad-ı cezaiyede mevcudinin sülüsanının ekseriyetine itibar edilir ve mevad-ı sairede tesavi-i ara vukuunda valinin ve gıyabı halinde riyaset makamında bulunan zatın reyi ne tarafta ise ekseriyet o tarafta addolunur.

Seksen dördüncü madde: Meclis-i idarenin kararlarında ihtilaf-ı ara vuku bulduğunda muhaliflerin istinad edeceği esbab seksen sekizinci maddede muharrer zabıt ceridesine derc edilir.

Seksen beşinci madde: Meclis-i mezkûrun umur-ı tahririyesi bir başkatibe mufavvaz olup maiyetinde mektubî-i vilayet kalemi ketebesinden lüzumu kadar refik bulundurulur.

Seksen altıncı madde: Meclis-i mezkûrun kâffe-i umur-ı tahririye ve kuyudiyesinin mesuliyeti başkatibe mufavvazdır.

Seksen yedinci madde: Meclis-i mezkûra havale olunan evraktan muhtac-ı tedkik ve telhis olanlar ibtida reis-i meclis olan valinin veyahut vekilinin emriyle başkatip ve refikleri vasıtasıyla hulasa olunup badehu müzakereye konulur.

Seksen sekizinci madde: Meclis-i mezkûrun kâffe-i müzakeratı azay-ı mevcudenin esamisi ve müzakerenin tarih ve yevm ve saati ve mevad-ı muhavele ile müteferriatının nevileri balada meşruh olduğu halde evvela mesalihin derece-i kifayede mealleri saniyen kararların tafsilatı ve ittifak veya ekseriyet ile olduğu salisen mevad-ı muhtelefun fihada muhaliflerin senedat-ı ihtilafatı başkatibin refakatinde bulunan ketebe tarafından ayrı ayrı kâğıtlara zabt olunup içtima-ı atide en evvel işbu evrak kıraat ve zabıtlarda noksan veya galat olduğunda başkatip tarafından tashih olunduktan sonra müzakere mazbatası namıyla matbu ve cedvellü bir cerideye nakl olunur ve işbu ceridede her günün müzakeratı reis ile azay-ı mevcude ve başkatip tarafından imza ve tasdik kılınır.