659

İki sene hizmet eylemiş bir Hıristiyan ve bir İslam aza memuriyetinden afv olunacağından bunların yerine bâlâda beyan olunan vekiller tarafından müceddeden intihab olunacak aza meclise tayin kılınacaktır.

On dokuzuncu bend: Kâmilen Hıristiyan veyahut İslam olan mutasarrıflıklarda mutasarrıflık muhtelit deâvî meclisi azasının dördü dahi Hıristiyan ya İslam olacaktır ve usul-i intihabiyenin icrası hususunu mübeyyin mazbata mutasarrıf tarafından temhîr olunarak bir nüsha-i musaddakası kuyûdda hıfz olunmak üzere meclis reisine tevdi olunacaktır.

Yirminci bend: Mutasarrıflık muhtelit deâvî meclisi azasına hizmette bulunacakları sene için altı bin kuruş maaş-ı senevî tahsis olunmuş olduğundan maaş-ı mezkûr bir sene zarfında meclisçe rü'yet-i masalih olunmak üzere her kaç gün tahsis olunur ise o kadar kısma taksim olunarak meclisin berây-ı iş gününde bilâ-özr-i makbul hazır bulunmayacak olan azanın bulunmadığı güne isabet edecek kıst-ı elyevm maaşı kat' olunarak işbu kıst-ı elyevmden hâsıl olan akçe o gün o meclisde bulunmuş olan sair azaya taksim olunacak ve her sene ibtidasında reis-i meclis bulunan zât meclis günlerini ve küşad ve hitâmı saatlerini bâ-ilânnâme tayin ve beyan eyleyecek ve işbu ilânnâme mutasarrıflık meclisinin istinafça merbut olacağı merkez vilayet meclis muhtelit reisi tarafından tasdik kılınacaktır.

Yirmi birinci bend: Kaza muhtelit deâvî meclisleri reislerinin hukuk vezaif ve memuriyetine dair on ikinci bendde beyan olunan ahkâm aynile mutasarrıflık muhtelit deâvî meclislerinin reislerine dahi aid olacaktır.

( Kısım-ı Sâlis )

( Merkez-i Vilayet Girid Muhtelit Deâvî Meclisinin Suret-i Teşekkülü )

Yirmi ikinci bend: Girid ceziresinde vilayet muhtelit deâvî meclisi bulunacak ve işbu meclis merkez-i vilayetde olacaktır.