668

( Kısım-ı Âşir )
( Ticaret mahkemelerinin vazife-i me’muriyetine dairdir )

Altmış üçüncü bend: Ticaret mahkemelerinin vazife-i me’muriyetleri Ticaret Kanunname-i Hümayunu zeylinin yirmi sekizinci maddesinden otuz sekizinci maddesine kadar olan mevadda beyan olunup ticaret mahkemesine doğrudan doğruya istid’a takdimiyle da’vanın rü’yet etdirilmesi caiz olacakdır.

Altmış dördüncü bend: Ticaret mahkemelerinin verdikleri ilamatın icrası kendüye aid olmayıp bu makule ilamatın icrasında niza’ ve da’va zuhuru takdirinde anların fasl ve rü’yeti ol mahalde muhtelit da’avi meclisine aiddir.

Altmış beşinci bend: Zeyl-i kanunname-i ticaret ve usul-i muhakeme-i ticaret nizamnamesi ahkamı mucebince istinaf olunan ticaret mahkemelerinin ilamatı istinafen vilayet muhtelit da’avi meclisinde fasl ve rü’yet olunacakdır.

( Kısım-ı Hadi Âşir )
( İhtiyar meclislerinin demogerondiyaların teşkiline dairdir )

Altmış altıncı bend: Hududu hükümet tarafından tayin ve tahsis olunacak olan her karyede bir ihtiyar meclisi bulunacakdır.

Altmış yedinci bend: Beher mutasarrıflık makarrında dahi biri hristiyan ve diğeri islama mahsus iki demogerondiya bulunacak olduğu gibi hristiyan demogerondiyası mutasarrıflığın reis-i ruhanisiyle mutasarrıflık muhtelit da’avi meclisi hristiyan azalarının birinden ve kezalik mutasarrıflık idare meclisi aza-yi hristiyaniyesinin birinden ve dahil-i mutasarrıflık olan bilcümle karyelerin ihtiyar meclisleri aza-yi hristiyaniyesinden üç sene müddet içün intihab olunacak iki hristiyandan ve islam demogerondiyası kezalik naib-i şer’ ile mutasarrıflık meclis-i muhtelit da’avi meclisinin islam azasının birinden ve mutasarrıflık idare meclisinin islam azasının birinden ve dahil-i mutasarrıflık olan bilcümle karyeler ihtiyar meclisleri aza-yi islamiyesinden üç sene müddet içün intihab olunacak iki islamdan mürekkeb olacakdır.

( Kısım )