671

Veyahud suret-i kat’iyyede i’lamları verilmiş veyahud henüz muhakeme olunmamış olan da’vaların keyfiyet ve kemmiyeti ve hasımların kangı dine mensub olduklarını ve rü’yet olunan da’vaların hadd-i vasat üzere müddet-i muhakemelerini mübeyyin olmak üzere tanzim olunacakdır.

Yetmiş yedinci bend — Bend-i sabıkda zikr olunan vilayet muhtelit deavi meclisi reisi ber-vech-i bala beher sene takdim edecek olduğu cedvel-i mezkûr zirinde ıslah-ı icraat-ı hukukiye zımnında ittihazı lazımeden add olunacak tedabire dâir mülahazat-ı zatiye veyahud umumiyeyi ilave ve irad etmeğe me’zun olacakdır.

( Kısm-ı Evvel )
( Girit vilayetinin idare-i umumiyesine dâirdir )

Birinci bend — Girit vilayeti beş liva ve yigirmi kazaya taksim olunub her bir kaza aded ve hududları ta’yin olunacak karyeleri havi olacakdır.

İkinci bend — Elviye-i hamse-i mezkûre Hanya ve İsfakya ve Resmo ve Kandiye ve Laşid mutasarrıflıklarıdır.

Üçüncü bend — Hanya livası nefs-i Hanya ile Hanya ve Kisamo ve Selino kazalarından ve İsfakya livası İsfakya ve Ebi Vasil ve Apokron kazalarından ve Resmo livası nefs-i Resmo ile Resmo ve Milopotamo ve Amadi kazalarından ve Kandiye livası nefs-i Kandiye ile Temnos ve Maleviz ve Pirponiçe ve Kenoyo ve Monikaço ve Pediye ve Rizo kazalarından ve Laşid livası Laşid ve Mirabello ve İstiye ve Yerapetre kazalarından mürekkeb olacakdır.

Dördüncü bend — Zikr olunan kazalar hudud-ı sabıkalarıyla mahdud olacaklardır.

Beşinci bend — Girit ceziresinin idare-i umur-ı mülkiyesi taraf-ı eşref-i hazret-i padişahiden mansub bir valiye ve livaların umur-ı mülkiyesi nısfı müslim ve nısf-ı diğeri hristiyan olmak üzere memurin-i devlet-i aliyeden müntehab ve bi-irade-i seniye mansub mutasarrıflara tefviz ve ihale olunacak ve her bir kazada icabına göre müslim veyahud hristiyan memurinden müntehab ve taraf-ı devletden mansub birer kâim-makam bulunacakdır.