674

Ta’dilâtı icra edileceğinden bu vechile tezekkür olunacak nizamname ve kararlar iktiza ettikçe canib-i Bab-ı Âli’den ba’de’l-isti’zan vali tarafından icra olunabileceği misillü vali canibinden meclise arz olunup meclisden külliyen red veyahud ta’dil olunmuş kararlar ta’dilât-ı vakıa kabul olunmaksızın irade-i seniyye-i mahsusa şerefsünûh buyurulmadıkça mevki-i icraya konulamayacak ve fakat bi’l-irade-i seniyye tasdik buyurulmak kayd ve şartıyla şiddet-i lüzumu ilân ve terettüb edecek kâffe-i mes’uliyeti kâmilen üzerine aldığı beyan olunduğu halde o misillü tedabirin vali tarafından icrasına şuru’ olunabilecektir.

On beşinci bend: Ahali-i cezirenin ekser veyahud bir cüz’ünü nakden bir meblağ i’tasına ve aynen bir hizmet icrasına veyahud haiz oldukları bir hakkın terkine mecbur edecek ya’ni seyr-i sefain hususunda ifa olunan rüsumatın tezyidi ve esnaflık resmi ahzı ve sıhhat-i umumiyeye muzır veyahud nizam-ı mahsusuna ve adat-ı beldeye muğayir bulunduğu ecilden bir fabrika ve bir destgâh veyahud bir mağazanın sed ve bendi ve ba’zı sefain-i mahsusa veyahud bahren posta işletilmesi ve ceza kanunnamesinde ta’yin olunmamış ba’zı ef’al ve harekâtdan dolayı cezay-ı nakdi misillü tedabir ittihazında vali-i vilayet ile idare meclisi bend-i sabıkda beyan olunan hukuk-ı müşterekeyi haiz ve vezaif-i mütekabile ile mükelleftirler.

On altıncı bend: Hükümet namına olarak ahad-ı nasdan biriyle yapılacak her nev’ pazarlık ve mukavele ve kontrato hususunda vali-i vilayet ile idare meclisinin hukuk ve vezaif-i müşterekeleri on dördüncü bendde muharrer olduğu minval üzere olacaktır.

On yedinci bend: Bir madde-i kanuniye veyahud cezirenin cem’iyet-i umumiyesi canibinden tasvib olunmuş karar mucibince cezire ahalisi üzerine tarh olunacak tekâlifin livalarca taksimi ve cem’iyet-i mezkûre canibinden ber-vech-i muharrer tahsili mukarrer olan rüsumatın suver-i tahsiliyesinin ta’yini vilayet idare meclisinin vezaif-i mahsusasındandır.

On sekizinci bend: Meclis-i mezkûr muamelât-ı hesabiyece tetkikatı nizamen…