680

Kaza meclis-i idare ve muhtalit mahkemelerinin azay-ı müslimesi tarafından ve Hıristiyan azası mecalis ve mehakim-i mezkûre Hıristiyan azası tarafından intihab kılınacaktır. Elviye meclis-i idareleri azay-ı muhtalit muhakeme aza intihabı içün tanzim olunacak defterde muharrer esamiden intihab olunacak azanın müddetleri iki sene olacaktır ve bunlara senevî altışar bin kuruş maaş tahsis kılınacaktır.

( Kısım-ı Râbi )
( İhtiyar meclislerine dairdir )

Kırk dördüncü bend: Köylerin suret-i idaresi bir kanunname-i mahsus ile tanzim olunacak ve Meclis-i Umumî tarafından buna dair iktiza eden nizamat devletin tasvibine arz ve takdim kılınacak olduğundan kanunname-i mezkûre vaz ve tesis olununcaya değin köyler şimdiye kadar olageldiği misillü ihtiyar meclisleri tarafından idare olunacaktır.

( Bâb-ı Evvel )
( Meclis-i Umumî azasının suret-i intihabına dairdir )

Birinci bend: Meclis-i Umumî beher kazadan intihab olunup merkez-i vilayette içtima edecek vekillerden teşekkül edecektir. Ve her bir kazadan intihab olunacak vekiller dört neferden ibaret olup ahalisi İslam ve Hıristiyandan mürekkeb olan kazalardan ikisi İslam ve ikisi Hıristiyan olarak intihab olunacakları misillü ahalisi sırf İslam veyahut Hıristiyan olan kazalardan dahi vekillerin dördü de ya İslam veyahut Hıristiyan olacaktır.

İkinci bend: Kazalardan maada Hanya ve Kandiye ve Resmo şehirlerinden dahi kezalik ikisi İslam ve ikisi Hıristiyan olmak üzere dörder vekil intihab kılınacaktır.

Üçüncü bend: Vekiller beher sene Kânun-ı Evvel’in onunda makarr-ı kaymakamîde tecemmü edecek kazanın ihtiyar meclisleri tarafından intihab olunacağından yevm-i intihabın hululünden la-akal on beş gün evvel kaymakam tarafından ilan-ı keyfiyetle ihtiyar meclisleri vekillerin icra-yı intihabına davet kılınacaktır.

*Dördüncü*