684

olarak icra-yı müzakerata memur olup mevad-ı umumiyede cümlesi hazır oldukları halde akd-ı meclis edecekleri gibi mevad-ı hususiyede dahi içlerinden icab edenlerin yani yalnızce vükela-yı müslime veyahud vükela-yı hristiyanenin huzuru lazım gelecektir.

On sekizinci bend: Meclis-i umumi akdinde vali-i vilayet veyahud bilvekale müşavirlerden birisi reis sıfatıyla bulunacağı misillü meclis-i hususi akdinde dahi içlerinden riyasete intihab edecekleri zatın riyaseti tahtında olarak icra-yı müzakerat edebileceklerdir.

On dokuzuncu bend: Meclis-i umumi veya hususi bulunması iktiza eden vekillerden nısfından ziyadesi hazır bulunmadıkça icra-yı müzakerat olunmayacaktır.

Yirminci bend: Mecalis-i hususiyenin riyasetinde bulunacak olanların vezaifi yani müzakeratın idaresiyle muamelat-ı cariyenin nezareti sair mecalis rüesasına aid olan vezaif derecesinde olacaktır.

Yirmi birinci bend: Müzakeratın suret-i muntazama ve hasenede cereyanı zımnında vekiller meclisde reis bulunan zatın ol emrde ruhsatını istihsal ederek öylece söze başlayacaktır.

Yirmi ikinci bend: Meclisçe mevki-i müzakereye konulacak mevaddan kararlarında ittihad-ı ara hasıl olamayan hususat içün muayyen olan nizama tevfikan re’y-i hafi kaidesine müracaat olunacaktır.

Yirmi üçüncü bend: Meclis-i umuminin müzakeratı lisan-ı Rumi üzere dahi cereyan edebileceğinden vali-i vilayet canibinden vuku bulacak ifadat Rumcaya dahi biltercüme meclise tebliğ kılınacaktır.

Yirmi dördüncü bend: Müzakerat-ı cariye içün suret-i muntazamada kayd tutulacağından bir meclisde zabt olunan müzakerat meclis-i diğerde evvel be-evvel kıraat ve muhtac-ı tashih olan mahaller tahşiye olunarak reis-i meclis ve katib ile müzakerat-ı merkumede beyan-ı re’y etmiş olan vekiller canibinden temhir veya imza kılınacaktır.

Yirmi beşinci bend: On beşinci bendde beyan olunduğu üzere intihab olunacak vekillerin intihabnameleri ibraz olunup heyet-i meclis teşkil kılındıktan sonra

Meclis