69

Mesela müşteri satun aldığı bir top kumaşı kesüp biçdikden sonra çürük yahud yatkın olmak misillü bir ayb-ı kadîme muttali’ olsa çünki kesüp biçmesiyle bir yeni kusur daha peyda olduğundan red edemeyüb fakat ayb-ı kadîmden dolayı noksan-ı semen alır.

346 Madde: Noksan-ı semen bî-garaz ehl-i vukufun ihbarıyla malum olur. Şöyle ki mebiin bir kere salimen ve bir kere muîben kıymeti takvim ve takdir olunup bu iki kıymet beynindeki tefavüt salimen olan kıymetin kaçda biri ise semen-i müsemmânın ol nisbetle noksanı noksan-ı semen itibar olunur.

Mesela müşteri altmış kuruşa aldığı bir top kumaşı kesüp biçdikden sonra ayb-ı kadîme muttali’ oldukda ehl-i vukuf ol kumaşın salimen kıymeti altmış ve ayb-ı kadîmi ile kıymeti kırk beş kuruş olduğunu ihbar etseler noksan-ı semen on beş kuruş olmağla müşterinin anı talep ve dava etmeğe salahiyeti vardır.

Ve eğer ol malın salimen kıymeti seksen ve muîben kıymeti altmış kuruş olduğunu ihbar etseler işbu iki kıymet beynindeki tefavüt ki yirmi kuruşdur seksen kuruşun rub’u olmağla semen-i müsemmânın rub’u olan on beş kuruşu müşterinin talep ve davaya salahiyeti olur.

Ve eğer ol kumaşın salimen kıymeti elli ve muîben kıymeti kırk kuruş olduğunu ihbar etseler iki kıymet beyninde tefavüt olan on kuruş elli kuruşun humsu olmağla semen-i müsemmânın humsu olan on iki kuruş noksan-ı semen itibar olunur.

347 Madde: Ayb-ı hâdis zâil olsa ayb-ı kadîm yine reddi mucib olur. Mesela bir hayvan iştira olunup da müşteri indinde hasta oldukdan sonra ayb-ı kadîmi meydana çıksa müşteri anı bayie red edemeyüp noksan-ı semen alır. Fakat ol hastalık zâil olsa müşteri ayb-ı kadîmi ile ol hayvanı bayie red eder.

348 Madde: Bayi eğer müşteri indinde bir ayb-ı hâdis oldukdan sonra ayb-ı kadîmi meydana çıkan mebii ol ayb-ı hâdis ile gerü almağa razı olur ise mani-i red bulunmadığı takdirde müşterinin noksan-ı semen iddiasına salahiyeti