705

Bunun vazifeleri dahi turuk ve maabirin ve ebniye-i umumiyenin tesviye ve tanzimi ve umur-ı ticaret ve ziraatin tevsi‘a müteallik olan hususatı ve bunlar içün verilen imtiyazat ve mukavelatı tetkik ve müzakere eylemekdir. Beşinci daire-i maarif olub bu dahi terbiye-i umumiyenin intişarına ve o cihetle mekatib ve medaris-i mülkiyeye aid umuru müzakereye memurdur. Eşhas ile hükümet beyninde olan deâvî kangı daireye müteallik ise o dairede fasl ve rü’yet ve hükm olunur.

Dördüncü madde: Mevad-ı sabıkada beyan olundığı vechle Şura-yı Devletin kendisine havale olunan hususatın müzakere ve tetkikine memuriyeti olarak icraatı devair ve memurin-i mahsusasına aid bulındığı cihetle umur-ı icraiyeye bir gûne müdahaleye hakkı olamayub fakat kavanin ve nizamatın tamami-i cereyanına nezarete ve adem-i hüsn-i icraları takdirinde lazım gelenlere beyan-ı hale me’zundur.

Beşinci madde: Her daire bilhassa memuru oldığı mesalihi kararlaşdırub vereceği mazbata arz olunur fakat o makule yalnız bir dairenin re’yi ile yürinecek mazbatalara Şura-yı Devletin büyük mührü dahi basılacakdır. Reis evvel kendü hazır oldığı halde müzakere olunan mevadın mazbatalarını mühr-i zatisiyle temhir eder ve kavanin ve nizamat-ı esasiyeye müteallik olan mevad evvela daire-i mahsusasında tezekkür olundukdan sonra meclisin hey’et-i umumiyesinde müzakere olunmadıkça arz olunmayacakdır.

Altıncı madde: Şura-yı Devlet vükela-yı fihamdan bir zatın taht-ı riyasetinde olub refakatinde beş reis-i sani ve bir baş katib bulunacakdır ve beher dairede beşden nakıs ve ondan ziyade ve o cihetle umum meclisde elliden ziyade olmamak üzere aza bulunacakdır ve her bir dairede ber vech-i muharrer beş azadan nakıs olmamak üzere aza-yı mevcude devairin ehemmiyetine göre taksim olunacakdır.

Yedinci madde: Reis ve reis-i saniler ve baş katib ve aza-yı meclis intihab ve irade-i seniye-i padişahi ile ba-ferman-ı ali nasb ve tayin olunur.
Sekizinci madde: Şura-yı Devlet devairinin her birinde beşer muavin ve beşer mülazım...