715

Otuz sekizinci madde: Daireye havale olunan mesalihing müzakeresiyle verilecek kararlar azanın mühr-i zatileriyle memhur mazbata ile arz olunur ve Reis-i Evvelin bizzat müzakeresinde bulunmadığı mesalihe dair yapılan mazbatalarda mühr-i zatisinin yerine Şura-yı Devlet’in mühr-i resmisi basılır ve tamamıyla muvafık-ı nizam ve kanun olan maddeler için yazılan zeyller dahi Şura-yı Devlet mührüyle temhir kılınır.

Otuz dokuzuncu madde: Dairelerde kaleme alınacak nizamnameler içinde hiç başka söz olmayarak layiha suretinde tanzim ve esbab-ı mucibesi mazbata-i mahsusa ile beyan olunur ve nezaretlerden ve sair devairden kaleme alınıp Şura-yı Devlet’e havale edilen nizamat layihaları aynen kabul ve tasdik olunduğu halde kabulünü icab eden esbab ba-mazbata ifade ile layihanın zeyli tasdik kılınır.

Kırkıncı madde: İttihad ile olmayıp ekseriyet-i ara ile karar verilen maddelerin mazbatalarının mühürleri yerine muhalif reyde bulunanların isimleri yazılıp rey-i muhalifde oldukları gösterilecektir.

(Fasl-ı Hâmis)

(Heyet-i Umumiyenin suret-i in’ikadına ve usul-i müzakeratına)
(Ve riyasetin vezaifine dairdir)

Kırk birinci madde: Heyet-i Umumiye mutlaka Şura-yı Devlet Reisi bulunan zatın taht-ı riyasetinde olarak akd olunur.

Kırk ikinci madde: Heyet-i Umumiye haftada iki defa içtima edecek ve hin-i lüzumunda yevm-i muayyenlerinden başka günde dahi makam-ı riyasetten emr olunarak akd olunacaktır.

Kırk üçüncü madde: Heyet-i Umumiyenin yevm-i içtimaında ma’zuren bulunamayacak aza makam-ı riyasete ihbar etmeğe mecbur olacaklardır.

Kırk dördüncü madde: Heyet-i Umumiyenin kâffe-i umur-ı tahririyesinin ve zabıt ceridesinin idaresi Şura-yı Devlet Başkitabetinin vezaifindendir.

Kırk beşinci madde: Muhakemat Dairesi mesalihi için içtima edecek Heyet-i Umumiye daire-i mezkure aza ve muavinleri ile diğer dairelerin azasından...