730

(Şûrâ-yı Devlet ile mecâlis-i idârede rü'yet olunan de'âvîde)
(Alınacak harclara dâir tahrîrât-ı sâmiye)

Tekrâra hâcet olmadığı üzere hükûmetle eşhâs beyninde tehaddüs eden de'âvînin fasl ve rü'yeti mecâlis-i idâreye ve münhasıran şahseyn beyninde tekevvün eden nizâman rü'yeti lâzım gelen de'âvînin fasl ve hükmü dahi dîvân ve mecâlis-i temyîzlere muhavvel olup yalnız şahseyn arasında hâdis olan da'vâların mehâkim-i nizâmiyede rü'yetiyle i'lâmının tanzîminde haksız çıkan taraftan harc alınmakda olduğu hâlde hükûmetle eşhâs beyninde tehaddüs edip mecâlis-i idârede rü'yet olunan vâkı'aya müte'allik olan da'vâlar içün harc alınmamakta ise de bu nev' de'âvînin eşhâs beyninde tekevvün eden de'âvîden mu'âmelâtca bir gûne farkı olmadığından cihet-i iltizâmdan dolayı hazîne ile müte'ahhid ve mültezimler arasında tekevvün eden ve müte'ahhidlerle mültezimler beyninde zuhûr eden de'âvînin Dîvân-ı Muhâkemât-ı Mâliye'de rü'yetiyle hüküm mazbatasının i'tâsında haksız çıkan taraftan yüzde iki harc alınması kâ'ide ittihâz olunduğu misillü Şûrâ-yı Devlet Muhâkemât Dâiresiyle şahıs ile hükûmet beyninde mütekevvün de'âvî rü'yetine me'mûr olan idâre meclislerinde dahi şahıs ile hükûmet beyninde akçeye müte'allik olan de'âvîde şahıs tarafı haksız çıkdığı sûretde bu vechle mazbata harcı alınması Şûrâ-yı Devlet Hey'et-i Umûmiyesi'nde bi't-tensîb icrâ-yı iktizâsına emr ü irâde-i seniyye-i hazret-i pâdişâhî müte'allik ve şeref-sudûr buyurulmuş olmağla keyfiyetin i'lânıyla ber-mûceb-i irâde-i seniyye îfâ-yı muktezâsına himmet buyurmaları.

Fî 19 Ramazân sene 1286

Kazâ