725

( Suret-i Hatt-ı Hümayun )
( İşbu nizamname mucibince amel ve hareket ve hilafından )
( hazer ve mücanebet oluna )

( Birinci Fasıl Mecidiye Nişan-ı Hümayununuñ Suret-i Teşkili )

Birinci bend: Her nevi‘ hidemat-ı saltanat-ı seniyede ibraz-ı me’asir-i cemile iden bendegâne mucib-i iftihar ve imtiyaz olmak üzre nam-ı nami-i hazret-i şehinşahiye mensub olarak Mecidiye ism-i celili ile bir nişan-ı âli vaz‘ ve te’sis buyurulmuşdur.

İkinci bend: İşbu nişan-ı âli zat-ı şevket-simat hazret-i şahaneniñ himayet-i mahsusa-i cenab-ı padişahileri tahtındadır.

Üçüncü bend: Mecidiye nişan-ı hümayunu birinci ve ikinci ve üçüncü ve dördüncü ve beşinci rütbeleri nam ve unvanıyla beş rütbeden ibaretdir.

Dördüncü bend: İşbu nişan-ı hümayun kayd-ı hayat ile ihsan buyurulur.

Beşinci bend: Mecidiye nişan-ı hümayununuñ her rütbesi adedi mahdud olub birinci rütbesi elli ve ikinci rütbesi yüz elli ve üçüncü rütbesi sekiz yüz ve dördüncü rütbesi üç biñ ve beşinci rütbesi altı biñ aded olacakdır.

Altıncı bend: Taraf-ı eşref-i hazret-i şehinşahiden ecnebiye ihsan buyurulacak nişanlarıñ her rütbesi bu adedden haric olacakdır.

( İkinci Fasıl Mecidiye Nişan-ı Hümayununuñ Şekli ve Suret-i Ta‘likı )

Yedinci bend: Mecidiye nişan-ı hümayunu her biriniñ arasında alamet-i seniye-i devlet-i aliye olan birer ay yıldız olmak üzre üçer şu‘beli yedi şu‘adan ibaret sim bir güneş resminde olub dördüncü rütbesine kadar altun ve beşinci rütbesinde sim levha üzerinde olmak üzre vasatları tuğra-yı garra-yı hazret-i şehinşahi ile müzeyyen ve bunuñ etrafında kırmızı mina üzerine altun hatla işbu nişan-ı âliye nailiyet içün sıfat-ı lazıme-i istihkakiye olan hamiyet ve gayret ve sadakat kelimeleriyle vaz‘ ve te’sisiniñ tarihi olan biñ iki yüz...