727

...ve mülkiyeden olanlar her vakitde işbu nişan-ı âliye nâil olmak içün bulunduğu silkde lâ-akal yirmi sene müddet mümtaz ve memduh olarak hizmeti sebkat etmek lâzımdandır.

On İkinci Bend: İşbu nizamnâme mucibince Mecidiye Nişan-ı Hümâyununa kesb-i istihkak edenlere ibtidâ işbu nişan-ı âlinin beşinci rütbesi verilecektir.

On Üçüncü Bend: İbtidâ nişana nâiliyetde saltanat-ı seniyyeye hüsn-i hizmet lâzime-i istihkak olduğu gibi işbu nişan-ı âlinin bir rütbesinden diğerine geçmekde kesb-i istihkak edenler silkine ilhak içün dahi hüsn-i hizmet ile memduh olmak meşrut olup fakat lâ-akal beşinci rütbesinde iki sene dördüncü rütbesinde üç sene üçüncü rütbesinde üç sene ikinci rütbesinde dört sene bulunmuş olan kimsenin bulunduğu rütbenin mâfevkine terfii mümkün olamayacaktır.

On Dördüncü Bend: Sınıf-ı celîl-i askeriyede olanların dâhilen ve hâricen seferber oldukları vakitde ve muhârebe hâlinde müddet-i hizmetleri iki kat sayılacağından bunun keyfiyet-i tafsîliyesini mübeyyin Dâr-ı Şûrâ-yı Askeriye'de yapılıp dâimî olarak desturü'l-amel olacak bir nizamnâmenin ahkâmı üzerine iktizâsı icrâ olunacaktır.

On Beşinci Bend: Askeriyeden olanlar hazar ve seferde fevkalâde bir hizmet vücuda getirdikleri ve hizmet-i celîle-i padişâhîde ağırca yaralanmış oldukları halde gerek ibtidâ-yı emirde işbu nişan-ı hümâyuna neyl içün lâzım olan yirmi sene müddetden ve gerek beher bir rütbede beklemesi lâzım olan zamanlardan muaf olacaktır.

On Altıncı Bend: Sunûf-ı ilmiye ve mülkiyede hakikaten devlet ve millete nâfi fevkalâde bir hizmet-i mebrûre zuhura getiren bendegân ve maârif ve sanâyi ve zirâat ve ticâretin intişâr ve tevessüüne sebeb olacak bir hizmet-i sahîha-i makbuleye muvaffak olanlar ibtidâ işbu nişan-ı âliye istihkakın müddeti olan yirmi sene ile her rütbede muayyen olan müddetlerden muaf olacaklardır ve fakat her halde rütbe aşırı nişan verilmek câiz olmayacaktır.