733

İstihkak olduğu gibi işbu nişan-ı âlinin rütbesinden diğerine geçmekde kesb-i istihkak edenler sülküne iltihak içün dahi hüsn-i hizmet ile memduh olmak meşrut olup fakat lâ-akal üçüncü rütbesinde iki sene ve ikinci rütbesinde dört sene bulunmamış olan kimsenin bulunduğu rütbenin mâfevkine terfii mümkün olamayacakdır.

On üçüncü bend
Sınıf-ı celil-i askerîde olanların dâhilen ve haricen seferber oldukları vakitde ve muharebe halinde müddet-i hizmetleri iki kat sayılacakdır.

On dördüncü bend
Askerîden olanlar hazar ve seferde fevkalâde bir hizmet vücuda getirdikleri ve hizmet-i celile-i cenâb-ı padişahîde ağırca yaralanmış oldukları halde gerek ibtida-yı emirde işbu nişan-ı hümâyuna neyl içün lâzım olan yirmi sene müddetden ve gerek beher bir rütbede beklemesi lâzım olan zamanlardan muaf olacakdır.

On beşinci bend
Sunûf-ı ilmiye ve mülkiyede hakikaten devlet ve millete nâfi fevkalâde bir hizmet-i mebrûre zuhura getiren bendegân ve maârif ve sanayi ve ziraat ve ticaretin intişar ve tevsiine sebeb olacak bir hizmet-i sahîha-i makbûleye muvaffak olanlar ibtida işbu nişan-ı âliye istihkakın müddeti olan yirmi sene ile her rütbesinde muayyen olan müddetlerden muaf olacaklardır ve fakat her halde rütbe aşırı nişan verilmek câiz olamayacakdır.

On altıncı bend
Hasebü’l-icab sınıf-ı celil-i askerîden sunûf-ı sâireye nakl edenlerin sınıf-ı askerîde etdikleri hizmet müddeti nakl olundukları sınıfda ki müddet-i istihkaklarına zam olunacakdır.

On yedinci bend
Her bir sınıfda gerek müddet-i muayyenesiyle yeniden nişana ve gerek terfi-i rütbeye müstahak olanlar veyahud fevkalâde hizmet mukabilinde nişana ve terfi-i rütbeye ehliyeti bulunanlar içün istizân vukuunda ol kimsenin mensub olduğu sınıfın en büyük zâbiti tarafından hüsn-i hizmetle emeki müddeti veyahud fevkalâde hizmeti bi’l-etraf gösterilerek memhûr bir arz takdim