743

Bi’t-tedkik eğer bayiin malı olduğu tebeyyün eder ise kendülere teslimle beraber o halde hem bayiden ve hem de müşteriden beşer beşlik cezay-ı nakdi alınacaktır. Ve eğer o makule tezkeresiz hayvan mal-ı mesruk olduğu tebeyyün eder ise sarikı hakkında kanunen terettüb edecek sirkat cezası icra olunacağı gibi böyle bir tezkeresiz malı alan müşteriden dahi sirkat olduğunu bilerek almış olacağından anın hakkında dahi yataklık cezası icra kılınacaktır.

Beşinci Madde
Her memleketde teftiş veyahud zabtiye memurlarından ve daire-i belediye olan yerlerde dahi daire-i belediye meclisinden bir memur her gün o memleketde bulunan salhane ve kasabhanelere gidip ne mikdar hayvanat mevcud olduğunu tahkik ile hayvanlar kesildikçe anların tezkerelerini toplayıp hükümete götürecek ve bu tezkereler hükümetde şakk ve hark olunacaktır.

Altıncı Madde
Muhtarlar bir hayvan içün tezkere vereceği halde o hayvana tezkere isteyen adamın malı olduğunu muhtarın bilmesi ve bilmez ise layıkıyla tahkik etmesi ve aña göre tezkere vermesi lazım olduğundan eğer muhtarın tezkere verdiği hayvan ol adamın malı olmadığı ve mal-ı mesruk idüğü tebeyyün eder ise ol muhtar hırsızlara muavenet edenlerin cezasıyla mücazat olunacaktır ve bununla beraber muhtarlar şu maddeden dolayı kendülere ruhsat verilen yirmi paradan ziyade akçe isteyecek veyahud alacak olur ise o dahi hakkında cezayı müstelzim olacaktır.