75

387 Madde Sıhhat-ı selemin bekâsında semenin meclis-i akidde teslîmi şartdır. Ve âkideyn kabl-et-teslîm iftirâk ederler ise akd-i selem münfesih olur.

( Fasl-ı Râbi‘ )
( İstisnâ‘ beyânındadır )

388 Madde Bir kimse ehl-i sanâyiden birine bu kadar kuruşa şöyle bir şey yap deyip o dahi kabûl etse istisnâen bey‘ mün‘akid olur. Meselâ müşteri pabuçcuya ayağını göstererek falan nevi sahtiyândan şu kadar kuruşa bir çift pabuç yap deyip o dahi kabûl etse yâhud marangoz ile tûl ve arzını ve evsâf-ı lâzımesini beyân ederek bir kayık yâhud gemi yapmak üzere pazarlık etse istisnâ‘ mün‘akid olur. Kezâlik tûl ve hacmi ve sâir evsâf-ı lâzımesi beyân olunarak her biri şu kadar kuruşa olmak üzere bir fabrikacı ile şu kadar iğneli tüfenk yapmak üzere pazarlık olunsa istisnâ‘ mün‘akid olur.

389 Madde İstisnâ‘ın te‘âmül cârî olan şeylerde alel-ıtlak istisnâ‘ sahîhdir. Ammâ te‘âmül cârî olmayan şeylerde müddet beyân olunur ise selem olub anda şerâit-i selem mu‘teberdir. Ve eğer müddet beyân olunmazsa yine istisnâ‘ kabîlinden olur.

390 Madde İstisnâ‘da masnû‘un matlûba muvâfık olacak vechile tavsîf ve ta‘rîfi lâzımdır.

391 Madde İstisnâ‘da peşin akçe vermek lâzım değildir.

392 Madde İstisnâ‘ mün‘akid oldukdan sonra tarafeyn pazarlıkdan dönemez. Fakat masnû‘ eğer ta‘rîfe muvâfık olmazsa müstasni‘ muhayyerdir.

( Fasl-ı Hâmis )
( Bey‘-i marîzin ahkâmı beyânındadır )

393 Madde Bir marîz maraz-ı mevtinde iken veresesinden birisine bir şey satsa dîğer vârislerin icâzetine mevkûf olub marîzin vefâtından sonra icâzet verirler ise nâfiz olur ve vermezler ise nâfiz olmaz.