751

Ahval vukuunda bu nevi âlâtın zabtıyla temhir ederek iktizası icra olunmak üzere bâ-jurnal hükümet-i mahalliyeye teslim ve beyan-ı keyfiyet eyleyeceklerdir.

Yirmi üçüncü madde Mikyasat ve mevazinin on dördüncü madde mucibince icra-yı teftişinden maada valilerin evzan ve mikyasat hakkında ve işbu nizamname haricinde usul ve tedabire teşebbüsleri mutlaka Dahiliye Nezareti'nden istizana mevkufdur.

Yirmi dördüncü madde Evzan memurları ya kendiliklerinden veyahut hükümet-i mahalliye tarafından alacakları emir üzerine daima esnaf ve tüccarın istimal eyledikleri mikyasatı teftiş ve muayene edeceklerdir.

Yirmi beşinci madde Evzan memurları kanunun beyan eylediği evzan ve akyalin maadasını zabt edip kezalik bozulmuş ve nâkıs olan evzan ve akyali ve mevazini veyahut tatbik ve muayene damgalarının kâffesini şamil olmayan âlâtı zabt ile bu makule eşyayı hükümet-i mahalliyeye teslim edeceklerdir.

Yirmi altıncı madde Madde-i sabıkada beyan olunduğu vechle istimali memnu olan mikyasatın zabtıyla beraber bunların ne suretle mübayaa ve tedarik olunduğu ve ne kadar müddet istimal edildiği gibi iktiza eden tahkikatı icra ve tahriren hükümet-i mahalliyeye arz ve beyan edeceklerdir.

Yirmi yedinci madde Keyfiyet ve kemiyete halel getirecek surette yaslı ve koflu evzan ve akyal ve mevazin bulunduğu halde evzan memurları zabt edip der-akab hükümete teslim ve keyfiyeti inha edeceklerdir.

Yirmi sekizinci madde Muayene için tayin olunacak müddette esnaf ve tüccarın dükkan ve mağazalarında bulunmaları lazımdır.

Yirmi dokuzuncu madde Evzan memurları teftiş için geceleri dahi açık bulduğu dükkanlara girmeğe mezundur.

Otuzuncu madde Her ne zaman olur ise olsun teftiş ve muayene için gelecek evzan memurlarını dükkan ve mağazalarına kabulden istinkaf edenler bulunduğu takdirde taraf-ı hükümetten tayin olunacak memurlar marifetiyle girilecektir.